თბილისი, 3 მაისი — Sputnik. საქართველოს ეროვნული ბანკის ერთ-ერთი ძირითადი ფუნქცია ეროვნული ვალუტის ნამდვილობაზე კონტროლია.
რეგულატორის ანგარიშის თანახმად, 2016 წელს გამოვლინდა ლარის დაახლოებით 5,2 ათასი ყალბი ბანკნოტი და 15,6 ათასი ყალბი მონეტა.
ეროვნული ბანკი ქვეყნის პარლამენტს ანგარიშს ყოველ წელს წარუდგენს, რომელშიც შეჯამებულია რეგულატორის გაწეული მუშაობა პრიორიტეტული მიმართულებების კუთხით და მოცემულია ქვეყნის მაკროეკონომიკური მაჩვენებლების შეფასებები.
ყველაზე მეტად აყალბებენ ერთლარიან მონეტებს, მეორე ადგილზეა 20-ლარიანი ბანკნოტი, ხოლო მესამეზე — 50-ლარიანი.
ყველაზე იშვიათად აყალბებენ ორლარიან მონეტასა და ხუთლარიან ბანკნოტს.
ეროვნული ბანკი აკონტროლებს უცხოური ვალუტის გაყალბებასაც. 2016 წელს გამოვლინდა 707 ყალბი აშშ დოლარის ბანკნოტი და 116 — ევროს ბანკნოტი.