თბილისი, 24 აპრილი — Sputnik. ესტონეთის საგარეო საქმეთა მინისტრი სვენ მიკსერი საქართველოს ოფიციალური ვიზიტით 24 აპრილს ეწვევა, აღნიშნულია საქართველოს საგარეო საქმეთა სამინისტროს განცხადებაში.
ვიზიტის ფარგლებში ესტონეთის საგარეო უწყების ხელმძღვანელი შეხვდება თავის ქართველ კოლეგა მიხეილ ჯანელიძეს. ასევე გაიმართება შეხვედრა საქართველოს პრეზიდენტ გიორგი მარგველაშვილთან, პრემიერ–მინისტრ გიორგი კვირიკაშვილთან და პარლამენტის თავმჯდომარე ირაკლი კობახიძესთან.
საქართველომ და ესტონეთმა დიპლომატიური ურთიერთობები 1992 წლის 16 ივნისს დაამყარეს. მხარეები თანამშრომლობენ თავდაცვის, უსაფრთხოების, ეკონომიკის, ტურიზმის, განათლების, კულტურისა და გარემოს დაცვის სფეროებში.
საქონელბრუნვამ საქართველოსა და ესტონეთს შორის 2016 წელს 8,5 მლნ აშშ დოლარი შეადგინა, მათ შორის ექსპორტმა საქართველოდან — 2,8 მლნ აშშ დოლარი, ხოლო იმპორტმა საქართველოში — 5,7 მლნ აშშ დოლარი.