თბილისი, 22 აპრილი – Sputnik. მაზარ-ი-შარიფში ქართველი სამხედროები საქმიანობას ჩვეულ რეჟიმში განაგრძობენ და თავს უსაფრთხოდ გრძნობენ, ნათქვამია საქართველოს თავდაცვის სამინისტროს ვებ-გვერდზე.
გუშინ, ავღანურ ქვედანაყოფს 15 ამბოხებული ადგილობრივი დროით 13:40 საათზე დაესხა თავს. თავდასხმის შედეგად ავღანური ეროვნული არმიის 100-ზე მეტი მოსამსახურე დაიღუპა, ასევე, ავღანური სპეციალური რაზმის ერთი წევრი და ბაზაზე მომსახურე ერთი სამოქალაქო პირი. დაჭრილია ავღანური ბრიგადის 30 წარმომადგენელი. ამ დროის მონაცემებით, თხუთმეტივე თავდამსხმელი ლიკვიდირებულია.
თავდასხმის დროს ტერორისტები სამთავრობო ძალების ფორმაში იყვნენ გადაცმულები. ისინი ბაზაზე შეიჭრნენ, რამდენიმე აფეთქება მოაწყვეს და ჯარისკაცებს ცეცხლი გაუხსნეს.
ავღანეთში, ქალაქ მაზარ-ი-შარიფთან, ავღანურ ქვედანაყოფზე თავდასხმა იმ ბაზიდან 20 კილომეტრის მოშორებით განხორციელდა, სადაც ქართველი სამხედროები მსახურობენ. შესაბამისად, ქართული ასეული საქმიანობას ჩვეულ რეჟიმში განაგრძობს და თავს უსაფრთხოდ გრძნობს.
