თბილისი, 15 აპრილი — Sputnik. საქართველოში სიყვარულის დღე 15 აპრილს 1990-იანი წლების დასაწყისიდან აღინიშნება შოუბიზნესის წარმომადგენელ ბესიკ ჩუბინიძის ინიციატივით, როგორც ვალენტინობის ალტერნატივა.
შოუმენის წამოწყებამ ნაწილობრივ გაამართლა — საქართველოში ახალი დღესასწაულის დაწესებას ენთუზიაზმით შეხვდნენ, თუმცა არც ძველის აღნიშვნა შეუწყვეტიათ.
ასე რომ ახლა ჩვენში სიყვარულის დღე წელიწადში ორჯერ აღინიშნება — 14 თებერვალსა და 15 აპრილს.
პრინციპში, ეს გასაკვირი არცაა, ტემპერამენტული და ქარიზმატული ქართველი მამაკაცებისა და ულამაზესი, იდუმალებით აღსავსე ქალების გათვალისწინებით.
სიყვარულის დღეს განსაკუთრებით ახალგაზრდობა აღნიშნავს და ერთმანეთს სხვადასხვა სახის საჩუქრებს უძღვნიან: დაწყებული შოკოლადის ფილით, დასრულებული გიჟური გართობით. ის კი არა, ზოგიერთები სწორედ ამ დღეს ამთხვევენ ხელის თხოვნას.
