თბილისი, 13 აპრილი — Sputnik. საქართველოს პარლამენტის ყოფილი ვიცე-სპიკერი, კომპანია "ცენტრ-პოინტის" ერთ-ერთი დამფუძნებელი ვახტანგ რჩეულიშვილი 63 წლის ასაკში გარდაიცვალა, იუწყება ტელეკომპანია Rustavi2.
ვახტანგ რჩეულიშვილი, ჯანმრთელობის მდგომარეობის გაუარესების გამო, რამდენიმე კვირის წინ თოდუას კლინიკაში გადაიყვანეს. ექიმებმა მას სიმსივნის დიაგნოზი დაუსვეს.
რჩეულიშვილი 1954 წლის 1 იანვარს თბილისში დაიბადა. განათლებით ფიზიკოსი, 1979-1982 წლებში ახალგაზრდა მეცნიერთა კლუბის ვიცე-პრეზიდენტი იყო. 1982-1984 წლებში კომპარტიის ცენტრალური კომიტეტის ლექტორთა ჯგუფის ხელმძღვანელი იყო.
ვახტანგ რჩეულიშვილი იყო საქართველოს მე-3, მე-4, მე-5 მოწვევის პარლამენტის წევრი 1992-2003 წლებში.
რჩეულიშვილი იყო "საქართველოს სოციალისტური პარტიის" ლიდერი.
პოლიტიკაში ვახტანგ რჩეულიშვილი საბჭოთა კავშირის დაშლის შემდეგ მოვიდა. 1992-1995 წლებში საქართველოს პარლამენტის ვიცე-სპიკერის თანამდებობა ეკავა. 1995 წლის აგვისტოში პრეზიდენტ ედუარდ შევარდნაძესთან ერთად იმყოფებოდა ავტომობილში იმ დროს, როდესაც მისი აფეთქება სცადეს.
