„იყო საუბარი, თითქოს კომისიის მიზანი პრეზიდენტის სტატუსისა და უფლებამოსილების შეზღუდვაა. სტატუსი რჩება ზუსტად ისეთი, როგორც დღეს მოქმედი კონსტიტუციით არის განსაზღვრული. ეს არის მაღალი სტატუსი — საქართველოს პრეზიდენტი არის სახელმწიფოს მეთაური, უმაღლესი მთავარსარდალი, წარმოადგენს ქვეყანას საგარეო ურთიერთობებში. ცვლილება უფლებამოსილების კუთხით მხოლოდ იქ გვაქვს, სადაც ამას მოითხოვს იურიდიული ლოგიკა", — განაცხადა ირაკლი კობახიძემ საკონსტიტუციო კომისიის სხდომაზე.
73-კაციანმა სახელმწიფო საკონსტიტუციო კომისიამ მუშაობა 2016 წლის დეკემბერში დაიწყო. პირველ ეტაპზე კომისიის სამუშაო ჯგუფებმა თავი მოუყარეს ყველა ინიციატივას, რომელიც წარმოდგენილი იყო როგორც მმართველი პარტიის მხრიდან, ისე 7 ოპოზიციური პარტიის, ექსპერტებისა და არასამთავრობო ორგანიზაციების მხრიდან, შემდეგ კი მათ დეტალურ განხილვას შეუდგნენ.