თბილისი, 6 აპრილი — Sputnik. 2017 წლის პირველ კვარტალში რუსეთში ქართული ღვინის ექსპორტი 120%-ით გაიზარდა და 9 მილიონი ბოთლი შეადგინა, ნათქვამია სოფლის მეურნეობის ღვინის ეროვნული სააგენტოს ვებ-გვერდზე.
2017 წლის იანვარ-მარტში საქართველოდან ექსპორტზე 14,2 მილიონი ბოთლი (0,75ლიტრი) ღვინო გავიდა, რაც 85%-ით მეტია გასული წლის ანალოგიურ პერიოდთან შედარებით.
ამ პერიოდში საქართველომ მსოფლიოს 38 ქვეყანაში 32,2 მლნ აშშ დოლარის ღირებულების ღვინო გააგზავნა, რაც 77%-ით მეტია 2016 წლის ანალოგიურ პერიოდთან შედარებით.
პირველი სამი თვის მონაცემების თანახმად, ჩინეთი, სადაც 1,8 მილიონი ბოთლი ღვინოს ექსპორტი განხორციელდა, მეორე ადგილზეა. ამ ქვეყანაში ექსპორტის ზრდამ 38% შეადგინა. უკრაინა ქართული ღვინის იმპორტით მეორე ადგილზეა — 1,3 მილიონზე მეტი ბოთლი ღვინით. ამ ქვეყანაში ექსპორტის ზრდამ 20% შეადგინა.
ქართული ღვინის ძირითადი ექსპორტიორების ხუთეულში ასევე შედიან პოლონეთი – 561,3 ათასი ბოთლზე მეტი და ყაზახეთი – დაახლოებით 473,5 ათასი ბოთლი. იანვარ-მარტში პოლონეთში ექსპორტის მოცულობა 27%-ით გაიზარდა, ყაზახეთში კი 39%-ით.
მსოფლიოში ქართული ღვინის პოპულარობა იზრდება — საანგარიშო პერიოდში ისრაელში ექსპორტი 333%-ით გაიზარდა, კანადაში — 55%-ით, გერმანიაში 22%-ით, აშშ–ში 7%-ით გაიზარდა, ლატვიაში — 5%-ით და ა.შ.
"ექსპორტის მოცულობა გაიზარდა აშშ-ს, ევროკავშირის, ჩინეთის მიმართულებით და ასევე ტრადიციულ ბაზრებზე. 2017 წელი აქტიურად დაიწყო, ვიმედოვნებთ, რომ ექსპორტის ზრდის ტენდენცია წლის ბოლომდე შენარჩუნდება", — განაცხადა ჟურნალისტებთან ღვინის ეროვნული სააგენტოს უფროსმა გიორგი სამანიშვილმა.
უწყების მონაცემებით, საანგარიშო პერიოდში მსოფლიოს 13 ქვეყანაში ექსპორტირებულია 3,3 მილიონ ბოთლზე (0,5 ლ) მეტი ბრენდი, რაც 51%-ით აღემატება 2016 წლის მაჩვენებელს.
სულ ექსპორტირებულია 8,7 მლნ აშშ დოლარის ღირებულების ბრენდი, რაც 71%-ით მეტია გასული წლის იანვარ-მარტის პერიოდის მაჩვენებელზე.
2017 წლის პირველ სამ კვარტალში, მთლიანობაში, ღვინის, ბრენდის, ჭაჭის, ჩამოსასხმელი ბრენდისა და საბრენდე სპირტის ექსპორტის შედეგად მიღებულმა შემოსავლებმა 58,5 მლნ აშშ დოლარს გადააჭარბა, რაც 76%-ით მეტია 2016 წლის იანვარ-მარტის მონაცემთან შედარებით.
