თბილისი, 29 მარტი — Sputnik. ევროკავშირის საბჭომ დიდი ბრიტანეთის პრემიერ-მინისტრ ტერეზა მეის წერილი მიიღო, რომელიც ევროკავშირიდან ქვეყნის გასვლას ეხება, ნათქვამია ევროკავშირის საბჭოს ვებ-გვერდზე გამოქვეყნებულ განცხადებაში.
"ჩვენ ვწუხვართ, რომ დიდი ბრიტანეთი ევროპის კავშირს ტოვებს, მაგრამ მზად ვართ პროცესისთვის, რომელსაც უნდა მივყვეთ", — ნათქვამია ევროკავშირის საბჭოს განცხადებაში.
ევროკავშირის საბჭოს პრეზიდენტმა დონალდ ტუსკმა Twitter-ში გამოაქვეყნა ფოტოსურათი, რომელზეც ევროკავშირში დიდი ბრიტანეთის მუდმივი წარმომადგენელი, სერ ტიმ ბაროუ მას გადასცემს წერილს ქვეყნის ევროკავშირიდან გასვლის შეტყობინებით. ფოტოს შემდეგი წარწერა ახლავს: "წერილი 50-ე მუხლის (Brexit-ის ამოქმედების) შესახებ".
The Article 50 letter. #Brexit pic.twitter.com/SO5R5BTvhw
— Donald Tusk (@eucopresident) 29 марта 2017 г.
ტუსკმა ევროკავშირის საბჭოს სამიტი 29 აპრილისთვის მოიწვია.
ევროპარლამენტის თავმჯდომარემ ანტონიო ტაიანმა აღნიშნა, რომ ევროკავშირის საბჭო მოლაპარაკებებისთვის მზადაა და დიდ ბრიტანეთთან მჭიდრო თანამშრომლობის იმედი აქვს.
"დღეს არც ისე კარგი დღეა. Brexit-ი ჩვენი კავშირის ისტორიაში ახალი თავის დაწყებას ნიშნავს, მაგრამ ჩვენ მზად ვართ და იმ იმედით გავაგრძელებთ, რომ დიდი ბრიტანეთი ჩვენ ახლო პარტნიორად დარჩება", — დაწერა ტაიანმა Facebook-ის გვერდზე.
2016 წლის 23 ივნისს რეფერენდუმზე ბრიტანელების უმრავლესობამ მხარი ევროკავშირიდან გასვლას დაუჭირა. ამ დღეს ჩრდილოეთ ირლანდიამ და შოტლანდიამ ევროკავშირში დარჩენას, ხოლო ინგლისმა და უელსმა გასვლას მისცეს ხმა.
