თბილისი, 14 მარტი — Sputnik. საქართველოს მთავრობის სხდომა საპროტესტო აქციის ფონზე მიმდინარეობდა, რომელიც ხანძრის შედეგად განადგურებული სავაჭრო ცენტრის „ბავშვთა სამყაროს“ მოვაჭრეებმა მოაწყვეს.
ისინი სახელმწიფო კანცელარიის წინ პრემიერ-მინისტრთან გიორგი კვირიკაშვილთან შეხვედრის მოთხოვნით შეიკრიბნენ.
აქციის მონაწილენი უკმაყოფილებას გამოთქვამდნენ იმის გამო, რომ ხელისუფლება მათ კომპენსაციებს არ უხდის. ისინი ამტკიცებენ, რომ დაზარალებულთა ნაწილი უკვე 23 დღეა შიმშილობს.
„ჩვენ კომპენსაციებს ვითხოვთ… ხელისუფლებამ უნდა იგრძნოს პასუხისმგებლობა, იმისთვის რომ დროულად მოახდინოს რეაგირება იმ ვალდებულებებზე, რაც ხალხის წინაშე აქვს“, —თქვა აქციის ერთ-ერთმა მონაწილემ როინ ფეიქრიშვილმა.
მიუხედავად აქციის მონაწილეთა მოთხოვნისა, პრემიერმა შეხვედრაზე უარი თქვა.
თბილისის მერმა დავით ნარმანიამ ამ სიტუაციის კომენტირებისას განაცხადა, რომ კომერციულმა ბანკებმა მერიის თხოვნით გადაწყვიტეს 6 თვით გადაუვადონ დაზარალებულებს კრედიტის დაფარვის ვადა.
გარდა ამისა, ნარმანიას თქმით, თბილისის მერიამ თავის თავზე აიღო ბაზრების ასოციაციასთან შუამავლის როლი და მათ გამოყვეს სხვადსხვა ბაზრობებზე სავაჭრო ფართები შეღავათიანი პირობებით.
ხანძარი „ბავშვთა სამყაროს“ ოთხსართულიან შენობაში 30 იანვრის ღამეს მოხდა და მთლიანად გაანადგურა სხვადასხვა სავაჭრო ობიექტი, მათ შორის „ოქროს სამყარო“.
