თბილისი, 11 თებერვალი — Sputnik. საქართველოს შინაგან საქმეთა სამინისტროს თანამშრომლებმა განსაკუთრებით დიდი ოდენობით ნარკოტიკული საშუალების შეძენა-შენახვის ბრალდებით თბილისში 1987 წელს დაბადებული, წარსულში ნასამართლევი გ. ს. დააკავეს, ნათქვამია უწყების მიერ გავრცელებულ განცხადებაში.
185,1 გრამი ბუპრენორფინის შემცველი 460 აბი და 15 ნატეხი, ასევე, 640,61 გრამი ნარკოტიკული საშუალება „მდმა“-ს შემცველი 1633 აბი, აბის ნატეხები და ფხვნილი სამართალდამცველებმა ნივთმტკიცების სახით ამოიღეს.
ნარკოლოგიური შემოწმების შედეგად, გ. ს.-ს მარიხუანის მოხმარების ფაქტი დაუდგინდა.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე საქართველოს სსკ-ს 260-ე მუხლით მიმდინარეობს, რაც ისჯება რვიდან ოც წლამდე ან უვადო პატიმრობით.