თბილისი, 8 თებერვალი — Sputnik. ქართული მართლმადიდებლური ეკლესია 8 თებერვალს ქართველთა დიდი მეფის, წმინდანის დავით აღმაშენებლის (1089—1125 წწ) ხსენების დღეს აღნიშნავს.
დავით აღმაშენებელი მისმა სულიერმა მოძღვარმა არსენ იყალთოელმა აღზარდა. ის 1089 წელს, 16 წლის ასაკში გამეფდა და ქვეყანას 36 წლის განმავლობაში მართავდა.
დავით მეფეს აღმაშენებელი ხალხმა მისი დიდი შრომისა და ღვაწლის გამო უწოდა, რომელიც მან საქართველოს გამთლიანებასა და ქართული მართლმადიდებლური ეკლესიის განმტკიცებაში შეიტანა.
საქართველო დავითის მეფობის ხანაში გათავისუფლდა თურქ-სელჩუკების ბატონობისგან, გამთლიანდა და ერთიან, ძლიერ, ცენტრალიზებულ სახელმწიფოდ ჩამოყალიბდა.
წმინდა დავით მეფის ინიციატივით, სავარაუდოდ, 1103 წელს რუის-ურბნისის საეკლესიო კრება მოიწვიეს. მისმა დადგენილებებმა ხელი შეუწყო საეკლესიო ცხოვრების ბევრი წესის მოგვარებას, ეკლესიის სახელმწიფოს გაძლიერებისა და განმტკიცების სამსახურში ჩაყენებას.
დავით აღმაშენებელი ქვეყანაში განათლების დამკვიდრებას, მეცნიერების განვითარებას უწყობდა ხელს. მან დააფუძნა გელათისა და იყალთოს აკადემიები. მისი მეფობის ხანაში აშენდა ათეულობით ტაძარი და მონასტერი, დაარსდა ბევრი ახალი ქალაქი, ძველი კი გაფართოვდა.
საქართველოს უდიდესი მეფე 53 წლის ასაკში, 1125 წლის 24 იანვარს (ძველი სტილით) გარდაიცვალა. ის გელათის მონასტერშია დაკრძალული.
