გასული საუკუნის 20-იან წლებში პარიზის მოდის პოდიუმებზე ლამის განუწყვეტლივ ისმოდა ქართული მეტყველება. ყველაზე ხშირად ეს კოკო შანელის მოდის სახლში ხდებოდა, სადაც მანეკენებად (სწორედ ასე ერქვა მაშინ მოდელის პროფესიას) სამშობლოდან იძულებით გადახვეწილი რამდენიმე ქართველი ლამაზმანი მუშაობდა ერთდროულად. მათ შორის იყო თავადის ქალი რიმა ერისთავიც.
მშობლებმა, ვახტანგ ელიოზიშვილმა და თამარ ერისთავმა ქალიშვილს სახელი ოჯახის მეგობრის, ადმირალ გლაზენაპის მეუღლის პატივსაცემად დაარქვეს, რომელიც მისი ნათლია იყო.
ქსნის ერისთავების შთამომავალ დიდგვაროვან ქალბატონს, რომლის ღვიძლი ბიძაც იმპერატორ ნიკოლოზ მეორის ძმის, დიდი თავადი მიხაილ ალექსანდროვიჩის გენერალ–ადიუტანტი იყო, სხვა ემიგრანტებისგან განსხვავებით, საფრანგეთში დაფუძნება არ გასჭირვებია. იქ უკვე ცხოვრობდა მისი დედა, კნეინა თამარი, რომელსაც პარიზის მაღალი საზოგადოება „შავი ბრილიანტის“ სახელით იცნობდა.
თამარ ერისთავის გარემოცვა — ეს რუსული არისტოკრატიის უმაღლესი ფენა იყო, რომელთა სახლის კარი მუდამ ღია იყო კნეინასთვის.
რიმა ერისთავის შთამომავალმა მარინა ელიოზიშვილმა მიამბო:
„თამარს მისმა დამ, ბებიაჩემმა მარიამმა წინაპრებისგან, იმერეთის მეფეებისგან მემკვიდრეობით მიღებული ბრილიანტებითა და ზურმუხტებით შემკული ყელსაბამი მისცა. თამარმა სამკაული პარიზში მომგებიანად დააბანდა და შეძლებულად ცხოვრობდა“.
როდესაც რიმა, როგორც იქნა, პარიზში ჩავიდა, თამარმა ყველაფერი გააკეთა იმისთვის, რათა მისი ქალიშვილიც ბრწყინვალე საზოგადოების წევრი გამხდარიყო.
პარიზულ საზოგადოებაში ქართველ თავადის ასულს Princesse Rimma Eristoff-ად იცნობდნენ. ის მართლაც გამოირჩეოდა დახვეწილი არისტოკრატიული გარეგნობით, შესანიშნავი გემოვნებითა და მუსიკალური ნიჭით.
რიმა ერისთავი მოდების სახლ „იტებისა“ და კოკო შანელის მანეკენი იყო, რომლის სამოსითაც ჩნდებოდა მაღალ საზოგადოებაში. გარდა ამისა, რამდენიმე წელი თანამშრომლობდა მოდების სახლ „ირფესთანაც“, რომელიც რუსმა დიდთავადებმა — ფელიქს და ირინა იუსუპოვებმა დააარსეს.
მარინა ელიოზიშვილი იხსენებს, რომ სწორედ უმაღლეს არისტოკრატულ საზოგადოებასთან, კერძოდ, რომანოვების სამეფო გვართან სიახლოვემ გადაარჩინა კნიაჟნა რიმა პატიმრობას პარიზის ფაშისტური ოკუპაციის დროს.
ერთ დღეს მისთვის კომენდატურიდან გერმანელ ჯარისკაცებს მოუკითხავთ და ბარგის ჩალაგება უბრძანებიათ. ის-ის იყო, უკვე უნდა წაეყვანათ, რომ ერთ–ერთ ოფიცერს კედელზე ჩამოკიდებული ფოტო შეუნიშნავს. ფოტოზე იმპერატორი ნიკოლოზ მეორე იყო გამოსახული, უფლისწულ ალექსეისთან და მისი უდიდებულესობის ბადრაგის რამდენიმე ოფიცერთან ერთად.
ოფიცერი დაინტერესებულა, საიდან აღმოჩნდა რიმას ბინაში რუსეთის მეფის ფოტო, რაზეც კნიაჟნა ერისთავს უპასუხია, რომ გენერალ–ადიუტანტი, თავადი ალექსანდრე ერისთავი, რომელიც ხელმწიფეს გვერდს უმშვენებდა, მისი მკვიდრი ბიძა, დედის ძმა იყო.
პასუხს ოფიცერზე დიდი შთაბეჭდილება მოუხდენია, ქალბატონისთვის მყის ბოდიში მოუხდია და უთქვამს, რომ მისი კომენდატურაში წაყვანის არანაირი აუცილებლობა აღარ არსებობდა…
რიმა ერისთავს ოჯახი არ შეუქმნია, არავისთვის დაუკავშირებია ბედი. ბოლომდე დედასთან ერთად ცხოვრობდა. ორივე პარიზში გარდაიცვალა — თამარი 1975 წელს, რიმა კი შვიდი წლის შემდეგ.