თბილისი, 2 თებერვალი — Sputnik. საქართველოს კალათბურთის ნაკრების ცენტრი გიორგი შერმადინი, რომელიც ესპანურ „მორაბანკ ანდორაში“ გამოდის, გუნდის იანვრის საუკეთესო მოთამაშედ აღიარეს, იუწყება კლუბის ოფიციალური ვებ-გვერდი.
ქართველმა კალათბურთელმა გასულ თვეში ეროვნული ჩემპიონატის ოთხ მატჩში ითამაშა, თითოეულ თამაშში მოედანზე საშუალოდ დაახლოებით 27 წუთი დაჰყო. შერმადინი თამაშში საშუალოდ 18 ქულას და 9 მოხსნას აგროვებდა.
შერმადინის ე.წ. სარგებლიანობის კოეფიციენტმა იანვარში 27,8 შეადგინა.
აღსანიშნავია, რომ გასულ წელს შერმადინი მთელი სეზონის შედეგებით „მორაბანკ ანდორას“ საუკეთესო კალათბურთელად აღიარეს. ქართველის ანგარიშზე იყო 327 ქულა. შედარებისთვის — შედეგიანობის მიხედვით მეორე გახდა დავით ნავარო, რომლის აქტივში 247 ქულა იყო.
ესპანეთის ჩემპიონატის 18 ტურის შემდეგ „მორაბანკ ანდორას“ სატურნირო ცხრილში მეშვიდე ადგილი უკავია, მის ანგარიშზეა 10 გამარჯვება და რვა წაგება.
