თბილისი, 10 იანვარი – Sputnik. „საქართველოს ბანკის“ ერთ-ერთ ფილიალზე, რომელიც გლდანში, ხიზანიშვილის ქუჩაზე მდებარეობს, თავდასხმა განხორციელდა, იუწყება სააგენტო „ნოვოსტი-გრუზია“ შინაგან საქმეთა სამინისტროს პრეს-სამსახურზე დაყრდნობით.
დანაშაული დღეს, დილით მოხდა. გავრცელებული ინფორმაციით, თავდამსხმელი მარტო იყო. ჯერჯერობით უცნობია, რა რაოდენობის თანხა იქნა გატანილი ბანკის ფილიალიდან.
სისხლის სამართლის საქმე „ქურდობის“ მუხლით მიმდინარეობს, რაც 5-დან 7 წლამდე ვადით თავისუფლების აღკვეთას ითვალისწინებს.
დეკემბრის ბოლოს ამავე რაიონში „საქართველოს ბანკის“ კიდევ ერთი ფილიალი გაქურდეს. მაშინ პოლიციამ საქმის გახსნა მეორე დღესვე მოახერხა, სამართალდამცველებმა ნივთმტკიცების სახით ამოიღეს ნაქურდალი თანხის ნაწილი — 1 475 ევრო, 60 აშშ დოლარი და 640 ლარი.