თბილისი, 4 იანვარი — Sputnik. მცხეთა-სტეფანწმინდა-ლარსის საავტომობილო გზის 113-ე კილომეტრზე მდებარე მშრალ ხევზე ახალი ხიდი აშენდება, რომელიც 2017 წლის დეკემბერში დასრულდება, ნათქვამია საქართველოს რეგიონული განვითარებისა და ინფრასტრუქტურის სამინისტროს საავტომობილო გზების დეპარტამენტის ვებ-გვერდზე გამოქვეყნებულ ცნობაში.
ახალი ხიდი გახდება ალტერნატივა სოფელ კობთან 80-იან წლებში აშენებული ხიდისა, რომელიც აღდგენას აღარ ექვემდებარებოდა.
„განახლებული ინფრასტრუქტურა ხელს შეუწყობს ადგილობრივი მოსახლეობის, სატრანზიტო გადაზიდვებისა და ტურისტების უსაფრთხო და კომფორტულ გადაადგილებას ყაზბეგის მიმართულებით“, — ნათქვამია უწყების განცხადებაში.
პროექტის ღირებულება 4,55 მილიონი ლარია.
