შეიარაღებული დაპირისპირების, ცეცხლსასროლი იარაღის, მძიმე ტექნიკისა და ყუმბარმტყორცნების გამოყენების შედეგად მეოთხედი საუკუნის წინ თბილისში ათობით ადამიანი დაიღუპა, ქალაქის ცენტრი განადგურებული იყო.
წლის ბოლო კვირაში საქართველოს სამოქალაქო ომის დაწყებიდან 25 წელი შესრულდა. ეს დღე ისტორიაში შევიდა, როგორც "თბილისის ომი".
1991 წლის 20 დეკემბერს საქართველოს პრეზიდენტმა ზვიად გამსახურდიამ ეროვნული გვარდიის დაუყოვნებლივი განიარაღება და დაშლა მოითხოვა და მათზე შეტევით დაიმუქრა. 22 დეკემბერს დილით ეროვნული გვარდიის ნაწილებმა თბილისში ამბოხება მოაწყვეს და რამდენიმე სტრატეგიული ობიექტი ჩაიგდეს ხელში. "თბილისის ომი" საქართველოს პირველი პრეზიდენტის მომხრეებსა და ოპოზიციას შორის 15 დღის განმავლობაში გრძელდებოდა.
შეიარაღებული დაპირისპირების, ცეცხლსასროლი იარაღის, მძიმე ტექნიკისა და ყუმბარმტყორცნების გამოყენების შედეგად ათობით ადამიანი დაიღუპა, ქალაქის ცენტრი განადგურებული იყო. 6 იანვრის დილით პრეზიდენტმა გამსახურდიამ საკუთარ უახლოეს წრესთან ერთად საქართველო დატოვა და სომხეთში გადავიდა. იქიდან მოგვიანებით ჩეჩნეთში წავიდა.
ქვეყნის მართვა საკუთარ თავზე აიღო სამხედრო საბჭომ, რომლის შემადგენლობაშიც შედიოდნენ თენგიზ სიგუა, თენგიზ კიტოვანი და შეიარაღებული ფორმირება "მხედრიონის" ხელმძღვანელი ჯაბა იოსელიანი. გამარჯვებულთა სამეულმა სსრკ-ის საგარეო საქმეთა ყოფილი მინისტრი ედუარდ შევარდნაძე მიიჩნია ფიგურად, რომელსაც ქვეყანაში სამოქალაქო ომის შეჩერება შეეძლო. 1992 წლის 7 მარტს შევარდნაძე საქართველოში დაბრუნდა, 10 მარტს კი სახელმწიფო საბჭოს ხელმძღვანელი გახდა.
