თბილისი, 20 დეკემბერი — Sputnik. საქართველოს ეროვნულ ოლიმპიურ კომიტეტში სამშაბათს რიო-დე-ჟანეიროს ოლიმპიური ჩემპიონებისადმი მიძღვნილი წიგნების პრეზენტაცია გაიმართა.
ცერემონიას ესწრებოდნენ საქართველოს ეროვნული ოლიმპიური კომიტეტის პრეზიდენტი ლერი ხაბელოვი, ორგანიზაციის პირველი ვიცე-პრეზიდენტი ელგუჯა ბერიშვილი და წიგნების ორი მთავარი „პერსონაჟი“ – თავისუფალი სტილით მოჭიდავე ვლადიმერ ხინჩეგაშვილი და ძალოსანი ლაშა ტალახაძე, რომლებმაც ბრაზილიაში ოქროს მედლები მოიპოვეს.
„ჩვენთვის რიო-დე-ჟანეიროს ოლიმპიადა მიდიოდა დევიზით – „უკეთესად, ვიდრე ლონდონში“. და ამ ამოცანას ჩვენ გავუმკლავდით. რა თქმა უნდა, მეტი მედალი შეიძლებოდა აგვეღო, მაგრამ ეს სპორტია. ასე რომ, ჩვენ შედეგებით კმაყოფილი ვართ“, – აღნიშნა ხაბელოვმა.
„წიგნები და ფილმები — სპორტსმენების საქმიანობის საუკეთესო შეფასებაა. ყველას მადლობას ვუხდით, ვინც ამ წიგნების შექმნაში მონაწილეობას იღებდა. მომავალ წელს ეროვნული ოლიმპიური კომიტეტი ფილმების ციკლის გადაღებას აპირებს, რომელიც საქართველოს ყველა ოლიმპიურ ჩემპიონს მიეძღვნება“, — დაამატა ბერიშვილმა.
წიგნების ავტორებმა ოთარ მაღლაკელიძემ და ვასილ ბალახაძემ ეროვნული ოლიმპიური კომიტეტის ყველა წარმომადგენელს მასალების მოგროვებისა და წიგნებზე მუშაობის პროცესში გაწეული დახმარებისთვის მადლობა გადაუხადეს.
„ძალიან ამაყები ვართ, რომ საქართველოს ოლიმპიური ისტორიის ნაწილი გავხდით. ის, რომ ჩვენ შესახებ წიგნები დაიწერა, დიდი პატივია. მადლობა ყველას, ვინც მათ შექმნაში მონაწილეობდა“, – განაცხადა ხინჩეგაშვილმა.
ამ ორი წიგნის გარდა ეროვნულმა ოლიმპიურმა კომიტეტმა საზოგადოებას წარუდგინა ფოტოალბომი „ქართველები რიოში“, რომელიც ყველა ქართველ სპორტსმენს მიეძღვნა, რომელიც რიო-დე-ჟანეიროს ოლიმპიადაში მონაწილეობდა.
