თბილისი, 16 დეკემბერი — Sputnik. ევროკავშირის მიერ საქართველოს მოქალაქეებისთვის უვიზო რეჟიმის გაუქმება დამოკიდებული იქნება ქართველების ქცევაზე ევროპაში, განაცხადა იუსტიციის მინისტრმა თეა წულუკიანმა.
ევროპარლამენტმა ხუთშაბათს სტრასბურგში გამართულ ასამბლეის სესიაზე მხარი დაუჭირა საქართველოსა და უკრაინის მოქალაქეებისთვის ევროკავშირის ქვეყნებში უვიზო რეჟიმის დაწესების საკანონმდებლო პროცესის დასრულების საკითხს. გადაწყვეტილება ევროპარლამენტის დეპუტატთა ხმათა უმრავლესობით იქნა მიღებული.
„შესაძლებელია თუ არა უვიზო რეჟიმი გაგვიუქმდეს – ეს 100 პროცენტით არის დამოკიდებული საქართველოს თითოეული მოქალაქის ქცევაზე. არ უნდა დავარღვიოთ იქაური კანონები, არ მოვინდომოთ იქ დარჩენა, როცა იქ შესული ვართ 90 დღით და არა მეტით. აღარაფერს ვამბობ იმ მოქალაქეებზე, რომლებიც დასავლეთ ევროპულ ქვეყნებში ორგანიზებულ დანაშაულებში არიან ჩართული. მართალია, უმცირესობაა, მაგრამ მათმა საქციელმა ეს პროცესი გააჭიანურა, ეს ღიად უნდა ითქვას", — თქვა წულუკიანმა ბრიფინგზე.
მინისტრმა იმედი გამოთქვა, რომ რამდენიმე კვირის შემდეგ საქართველო შეძლებს სავიზო რეჟიმის ლიბერალიზაციის მიღებას ევროკავშირისგან.
ევროპარლამენტმა და ევროკომისიამ მიაღწიეს შეთანხმებას მესამე ქვეყნებისთვის უვიზო რეჟიმის შეჩერების მექანიზმთან დაკავშირებით იმ შემთხვევაში, თუ ამ ქვეყნების მხრიდან მიგრანტების უკონტროლო ნაკადი გადავა ევროკავშირის წევრ ერთ ან რამდენიმე სახელმწიფოში.
ამ ინსტრუმენტის გაჭიანურება აფერხებდა საქართველოსა და უკრაინის მოქალაქეებისთვის ევროკავშირის ქვეყნებში მოკლევადიანი მოგზაურობისთვის უვიზო რეჟიმის დაწესებას.
