თბილისი, 12 დეკემბერი — Sputnik. ნარიყალას ციხე-სიმაგრის რესტავრაცია 2017 წლის ბოლოს დასრულდება. სარემონტო სამუშაოებს თბილისის განვითარების ფონდი ახორციელებს.
აღდგენითი სამუშაოები მიმდინარე წლის ოქტომბერში დაიწყო. რემონტისთვის გამოყოფილია 727 ათასი ლარი, აქედან 300 ათასი ლარი 2016 წელს დაიხარჯება.
თბილისის მერი დავით ნარმანია პირველ ეტაპზე გათვალისწინებული სარემონტო სამუშაოების მიმდინარეობას გაეცნო და განაცხადა, რომ ციხე-სიმაგრეში ასეთი მასშტაბის სარესტავრაციო სამუშაოები დღემდე არ ჩატარებულა.
„რაც მთავარია, ციხე-სიმაგრე კულტურული მემკვიდრეობის წესების სრული დაცვით აღდგება და მომავალში კვლავ იქნება ერთ-ერთი ყველაზე მიმზიდველი ადგილი როგორც ჩვენი თანამოქალაქეებისთვის, ასევე უცხოელი ტურისტებისთვის“, — განაცხადა ნარმანიამ.
ნარიყალას ციხის რეაბილიტაცია პროექტ „ახალი ტფილისის“ ფარგლებში ხორციელდება. ციხის აღდგენაზე ძეგლთა დაცვის სფეროს სპეციალისტები მუშაობენ.
გრძელვადიანი პროექტი რამდენიმე ეტაპისგან შედგება. პირველ ეტაპზე ჩატარდება ციხე-სიმაგრის კედლების გასამაგრებელი სამუშაოები, შემდეგ — ფასადისა და სხვა დაზიანებული ნაწილების რესტავრაცია.
ნარიყალას ციხე-სიმაგრე თბილისის ერთ-ერთი მთავარი ღირსშესანიშნაობაა. ჩვენამდე მოღწეული ძირითადი ნაგებობები XVI-XVII საუკუნეებით თარიღდება. 1827 წელს მომხდარმა მიწისძვრამ ის მნიშვნელოვნად დააზიანა.
ამჟამად ციხე-სიმაგრე ავარიულ მდგომარეობაში.
