სპექტაკლი ერთგვარი თეატრალური ექსპერიმენტია მარჯანიშვილის თეატრის სცენაზე და იგი მწერალ გურამ ბათიაშვილის პიესის მიხედვით დაიდგა. სპექტაკლში რეჟისორმა შალომ ალეიხემის მოთხრობების ფრაგმენტებიც გამოიყენა. ესაა ებრაული ოჯახის ისტორია, რომელიც რეჟისორისა და დასის მიერ განხორციელებულ თავისებურ სცენურ ინტერპრეტაციას წარმოადგენს. თბილისში ამ სპექტაკლის პრემიერა აპრილის თვეში შედგა.
ჩვენ პიესის ავტორს, ბატონ გურამ ბათიაშვილს დავუკავშირდით და ამ პიესისა და სპექტაკლის შესახებ გავესაუბრეთ.
– ბატონო გურამ, ეს რეჟისორ ლევან წულაძისა და თქვენი პირველი ერთობლივი ნამუშევარი არ არის…
— დიახ, ლევან წულაძესთან მე შემოქმედებითი მეგობრობა მაქვს რა ხანია. მან ოთხი წლის წინ დადგა პიესა კოტე მარჯანიშვილზე, „მოქმედი პირნი და შემსრულებელნი“ – ასე ჰქვია ამ პიესას. მას აინტერესებდა ებრაული თემატიკა და მომცა შეკვეთა, დაკვეთა, მთხოვა, რომ დამეწერა პიესა ებრაულ თემაზე, თანაც მან იცის, რომ მე ამ თემაზე ვმუშაობ. მაქვს დაწერილი რომანები, პიესები. ჩვენ ვხვდებოდით ერთმანეთს და რამდენიმე შეხვედრა იმას მიეძღვნა, თუ როგორი აღნაგობის და რა სტილისტიკის უნდა ყოფილიყო ეს პიესა, დავიწყე მუშაობა და დაიწერა პიესა „გამოეშურე ჩემ საშველად ღმერთო“. ეს არის ფსალმუნის ფრაზა, უფრო ზუსტად, სიტყვები დავით მეფის ფსალმუნიდან. პირველივე შეხვედრაზე წულაძემ მთხოვა, რომ პიესაში ტექსტი ნაკლები ყოფილიყო. მე მაინც დავწერე ისე, როგორც ვწერ ხოლმე პიესას.
– საბოლოო ჯამში გადაწყდა, რომ პიესაში სიტყვები არ იქნებოდა…
— დიახ, როცა რეპეტიციები დაიწყო, საქმე იქითკენ წავიდა, რომ ტექსტი იქიდან საერთოდ ამოვიდა. ეს არავერბალური სპექტაკლია, რომელიც მხოლოდ ქმედებაზეა დამყარებული და პიესას ჰქვია „უცხოობაში“ – Begalut. ეს სიტყვა – begalut დიასპორაში, უცხოეთში მცხოვრებს ნიშნავს. ეს არის სლავურ სამყაროში მოქცეული ორი ებრაული ოჯახის ყოფა, სიყვარული, ღალატი, დარბევა. სხვათა შორის მსახიობებმა ამ პიესის არსი მაყურებლამდე კარგად მიიტანეს. მომავალ კვირას თეატრი ამ სპექტაკლით თელ-ავივში, ისრაელის საერთაშორისო თეატრალურ ფესტივალზეა მიწვეული და იქ მიდის. წესით, მეც უნდა წავიდე, მაგრამ არ ვიცი, შეიძლება ვერ მოვახერხო.
– წარმატებას გისურვებთ.
გურამ ბათიაშვილი – მწერალი და დრამატურგი. საქართველოს ხელოვნების დამსახურებული მოღვაწე, მსოფლიოს ებრაელთა კონგრესისა და სიონისტური ორგანიზაციის გამგეობების წევრი. მისი დოკუმენტური დრამა „კოტე მარჯანიშვილის ოთხი დღე“ დაიდგა ბათუმის დრამატულ თეატრში, პიესა „ლალი, სიყვარული და სხვები“ 1976 წელს მოსკოვის გოგოლის სახელობის თეატრში დაიდგა, ქუთაისის და რუსთავის თეატრებში დაიდგა გურამ ბათიაშვილის პიესა „ვალი“.
