„Sputnik-საქართველო" იმ ცნობილი ადამიანების შესახებ მოგითხრობთ, რომლებიც ამ დაავადებამ იმსხვერპლა.
შიდსით გარდაცვლილი ერთ-ერთი პირველი ცნობილი პიროვნება იყო ამერიკელი შემსრულებელ-ავანგარდისტი კლაუს ნომი, რომელიც დევიდ ბოუისთან ერთად მუშაობდა. ის 1983 წლის 6 აგვისტოს გარდაიცვალა.
შიდსით გარდაცვლილი ყველაზე ცნობილი ადამიანია ფრედი მერკური — ჯგუფ Queen-ის ლეგენდარული ვოკალისტი. თავისი დაავადების შესახებ მან საჯაროდ 1991 წელს 23 ნოემბერს განაცხადა, მეორე საღამოს კი გარდაიცვალა.
ისრაელის მომღერალი და მსახიობი ოფრა ჰაზა შიდსისგან 2000 წლის 23 თებერვალს გარდაიცვალა. ის სიკვდილს ორჯერ სასწაულებრივად გადაურჩა. პირველად ეს 1987 წელს მოხდა. ისრაელის სამხედრო თვითმფრინავმა, რომლითაც ის ქვეყნის სამხრეთით მდებარე ერთ-ერთ სამხედრო ბაზაზე გამართული კონცერტის შემდეგ ბრუნდებოდა, ავიაკატასტროფა განიცადა, მომღერალს კი მხოლოდ უმნიშვნელო დაზიანებები ჰქონდა. მეორედ 1994 წელს – მის თვითმფრინავს მეხი დაეცა, მაგრამ თვითმფრინავი მშვიდობიანად დაეშვა. მესამედ კი ჯადოსნური გადარჩენა აღარ მოხდა…
ცნობილი მწერალი-ფანტასტი აიზეკ აზიმოვი, ავტორი ისეთი წიგნებისა, როგორიცაა „მე — რობოტი“, „ორასი წლის ადამიანი“, „ცვლილებების ქარები“, 1983 წელს გულის ოპერაციის დროს დონორის სისხლის გადასხმისას შიდსით დაავადდა. დაავადების შესახებ მან განმეორებითი ოპერაციისთვის სამედიცინო შემოწმების გავლის დროს შემთხვევით გაიგო. აიზეკ აზიმოვი 1992 წლის 6 აპრილს 72 წლის ასაკში გარდაიცვალა.
ცნობილი ამერიკელი მსახიობი როკ ჰადსონიც, რომელიც ცნობილია ფილმებით „ყველაფერი, რაც ზემოდან ნებადართულია“ და „მშვენიერი მოჩვენება“, შიდსით გარდაიცვალა. 17 წლის მანძილზე ის თავის პარტნიორთან ტომ კლარკთან ერთად ცხოვრობდა.
ცნობილი რეჟისორის ალფრედ ჰიჩკოკის ფილმ „ფსიქოს“ ვარსკვლავი, „ოსკარის“ პრემიის მრავალგზის პრეტენდენტი ენტონი პერკინსი 60 წლის ასაკში შიდსით გარდაიცვალა, უფრო სწორად, მასთან დაკავშირებული პნევმონიისგან. მისი მეუღლე, ბერი ბერენსონი 2001 წლის 11 სექტემბრის ტერაქტების დროს დაიღუპა. ის ბოსტონიდან ლოს-ანჯელესში მიფრინავდა AA-11 რეისის თვითმფრინავით, რომელიც მსოფლიო სავაჭრო ცენტრის ჩრდილოეთ ცათამბჯენს შეეჯახა.
ლეგენდარული იტალიელი მოდელიერი ფრანკო მოსკინო შიდსისგან 1994 წელს გარდაიცვალა. მოდელიერის გარდაცვალების შემდეგაც Moschino კომერციულად წარმატებულ ბრენდად რჩება.
შიდსი დიდ მოცეკვავეს რუდოლფ ნურიევსაც აღმოაჩნდა. თურმე, ნურიევი სასიკვდილო ვირუსს 4 წელი ატარებდა. 1993 წლის 6 იანვარს რუდოლფ ნურიევი 54 წლის ასაკში გარდაიცვალა.
ჯანდაცვის მსოფლიო ორგანიზაციისა და გაეროს გენერალური ასამბლეის 1988 წელს მიღებული გადაწყვეტილებით, ყოველწლიურად 1 დეკემბერს შეძენილ იმუნოდეფიციტთან – აივ/შიდსთან ბრძოლის მსოფლიო დღე აღინიშნება (World AIDS Day).
