თბილისი, 29 ნოემბერი — Sputnik. საქართველოს სივრცითი მოწყობის კონცეფცია ქვეყანაში იმ შესაძლებლობების გამოვლენას ითვალისწინებს, რაც თითოეულ რეგიონს გააჩნია, განაცხადა ეკონომისტმა ლევან კალანდაძემ.
„სივრცითი განვითარების კონცეფციის მთავარი არსი იმაში მდგომარეობს, რომ პრაქტიკულად ყველა რეგიონში უზრუნველყოფილ იქნას დაახლოებით ერთნაირი განვითარების ტემპი, თავისი სოციალური სტანდარტებით, ეკონომიკური განვითარებით და ერთ სულ მოსახლეზე გამომუშავებული კეთილდღეობითა და ფინანსებით“, — აღნიშნა ლევან კალანდაძემ.
როგორც ეკონომისტმა განმარტა, დოკუმენტში, წინა მოდელისგან განსხვავებით, არ კეთდება აქცენტი მხოლოდ თბილისის, ბათუმის ან მესტიის განვითარებაზე, არამედ მოხდება ყველა რეგიონის პოტენციალის სრულფასოვანი გამოვლენა.
„ეს შეიძლება თითოეული მათგანისთვის სხვადასხვა იყოს. აქ მთავარია, რომ ვიპოვოთ ის მიმართულებები, რომლებიც რეგიონების განვითარების შესაძლებლობას მოგვცემს“, — თქვა კალანადაძემ.
მე-9 მოწვევის პარლამენტში განსახილველად შევიდა პროექტი საქართველოს სივრცითი მოწყობისა და მშენებლობის კოდექსში ცვლილებების შესახებ. 35 საკანონმდებლო ცვლილების პროექტისგან შემდგარი პაკეტი ეკონომიკისა და მდგრადი განვითარების სამინისტრომ მოამზადა.
ნატა პატარაია
