თბილისი, 25 ნოემბერი — Sputnik. ქართველმა თავისუფალი სტილით მოჭიდავეებმა ბაქოს „ოქროს გრან-პრიზე“ ოთხი მედალი მოიპოვეს, აღნიშნულია ჭიდაობის საერთაშორისო ფედერაციის (UWW) ვებ-გვერდზე განთავსებულ ცნობაში.
გენო პეტრიაშვილი (-125 კგ) გრან-პრის გამარჯვებული ფინალურ ორთაბრძოლაში გაუსვლელად გახდა. მისმა მეტოქემ, უკრაინელმა ალენ ზასეევმა გადამწყვეტ ორთაბრძოლაში მონაწილეობა ტრავმის გამო ვეღარ მიიღო.
ფინალში გავიდა ავთო კენჭაძე (-74 კგ), მაგრამ ტურნირის მასპინძელ ჯაბრაილ გასანოვს ვერ სძლია და ვერცხლს დასჯერდა.
საქართველოს ნაკრებს ორი ბრინჯაო მოუტანეს გიორგი რევაზიშვილმა (-61 კგ) და დავით მარსაგიშვილმა (-86 კგ).
ქალები ტურნირზე 25 იანვარს იასპარეზებენ, ხოლო ბერძნულ-რომაული სტილით მოჭიდავეები — 26 ნოემბერს.
„ოქროს გრან-პრის“ გამარჯვებული პრიზის სახით 5 ათას აშშ დოლარს მიიღებს, მეორე ადგილზე გასული — 3 ათასს, ხოლო ბრინჯაოს მფლობელი — 1 ათას აშშ დოლარს.
