თბილისი, 11 ნოემბერი — Sputnik. საფრანგეთის ნაციონალური ასამბლეის სპიკერმა კლოდ ბარტოლონემ აღმასრულებელ ხელისუფლებას ქვეყნის პრეზიდენტის ფრანსუა ოლანდის იმპიჩმენტის რეზოლუციის პროექტი შესთავაზა, იუწყება სააგენტო „რია ნოვოსტი“ სააგენტო „ფრანს პრესზე“ დაყრდნობით.
რეზოლუციას ხელი 79-მა დეპუტატმა მოაწერა, მათ შორის, საფრანგეთის ექს-პრემიერმა ფრანსუა ფიიონმა და ფრაქცია „რესპუბლიკელების“ თავმჯდომარემ კრისტიან ჟაკობმა, რომელმაც ოფიციალურად წარმოადგინა დოკუმენტი. პარტიის წარმომადგენლები ამტკიცებენ, რომ რეზოლუციას მოგვიანებით ფრაქციის ათამდე წევრიც შეუერთდება. პროცედურა მოითხოვს, რომ ქვეყნის პრეზიდენტი და პრემიერ-მინისტრი ინიციატივის შესახებ საქმის კურსში იყვნენ.
მემარჯვენე დეპუტატები ოლანდს სახელმწიფო საიდუმლოს გათქმაში ადანაშაულებენ, რომელიც ოლანდმა გაამჟღავნა თავის წიგნში „პრეზიდენტმა ეს არ უნდა თქვას“.
რეზოლუციის ბედის გადაწყვეტა პარლამენტის სპეციალური ბიუროს პრეროგატივაა: თუ დოკუმენტი დადგენილ სტანდარტებს შეესაბამება, ის ასამბლეის ქვედა პალატას გადაეცემა განსახილველად. იმპიჩმენტის პროცედურის დაწყების შემთხვევაში კი ასამბლეის ორი პალატა უმაღლეს სასამართლოს შეკრებს, რომელიც სახელმწიფო მეთაურის იმპიჩმენტის საკითხს გადაწყვეტს.
ექს-პრემიერმა ფიიონმა, რომელმაც რეზოლუციას მოაწერა ხელი, აღნიშნა, რომ ინიციატივას წარმატების არანაირი შანსი არ აქვს, რამდენადაც მის მიღებას პარლამენტის უმრავლესობის მხარდაჭერა სჭირდება, საკანონმდებლო ორგანოში კი უმრავლესობა მემარჯვენეებს არ აქვთ.
