ხელოვნების სასახლის კედლებზე გაცოცხლებული ივანე ასკურავას უნიკალური ნამუშევრები

ექსპოზიცია საქართველოს კულტურის და ძეგლთა დაცვის სამინისტროს მხარდაჭერით მომზადდა. თბილისის მერიისა და ხელოვნების მხარდაჭერის ცენტრის დახმარებით წელს პირველად ივანე ასკურავას ნამუშევრების ორენოვანი კატალოგიც გამოიცა.

სცენები ოპერის და ბალეტის თეატრის ცნობილი წარმოდგენებიდან ხელოვნების სასახლის კედლებზე ცოცხლდება.

გიორგი კალანდია — ხელოვნების სასახლის დირექტორი: „ივანე ასკურავას სივრცის გადმოცემის საოცარი უნარი ჰქონდა. იგი ისე აწყობდა დეკორაციას, ასიმეტრიულად, თან იმდენად სიმეტრიულად, რომ ძალიან კარგად გაგრძნობინებდა როგორც ეპოქის სულს, ასევე იმ განწყობას, რისი თქმაც სურდა მხატვარს“.

თავისი მოღვაწეობის მანძილზე ივანე ასკურავამ 200-ზე მეტ უნიკალურ დრამატულ, საოპერო და საბალეტო სპექტაკლზე, კინო-ტელეფილმსა თუ ტელეგადაცემაზე იმუშავა. 1948 წლიდან თითქმის ნახევარი საუკუნე დამდგმელ მხატვრად მუშაობდა ოპერისა და ბალეტის სახელმწიფო აკადემიურ თეატრში. ილიკო სუხიშვილის და ნინო რამიშვილის ანსამბლის მოცეკვავეები სწორედ ივანე ასკურავას ესკიზებით ხორცშესხმული კოსტიუმებით წარდგნენ პირველად დიდ  სცენაზე ქართული აუდიტორიის წინაშე.

მხატვრის შემოქმედებაში განსაკუთრებულად მნიშვნელოვან ფრაგმენტებს დიდ ბალეტმესიტერ ვახტანგ ჭაბუკიანთან თანამშრომლობის წლები ასახავს. მის მიერ გაფორმდა ძალზედ მნიშვნელოვანი საბალეტო სპექტაკლები „მთების გული“, „ჟიზელი“, „ლაურენსია“, „გორდა“, „დემონი“ და სხვა.

 „ივანე ასკურავა არის განსაკუთრებული მხატვარი. ძალიან დიდი ტრადიცია გვაქვს ქართული დეკორატიული მხატვრობისა, მაგრამ თუ ავიღებთ ნებისმიერ მის ნამუშევარს ყველგან ნახავთ განსაკუთრებულად გადმოცემულ სივრცეს, ყოველთვის იგრძნობა ის სივრცითი განწყობა, რაც ივანე ასკურავას ახასიათებს. თამამად შემიძლია ვთქვა, რომ იგი არის ეპოქა“, — გნაცხადა გიორგი კალანდიამ. 

ხელოვნების სასახლის საგამოფენო სივრცე გამოფენას 10 დღის განმავლობაში უმასპინძლებს.