თბილისი, 24 ოქტომბერი — Sputnik. თბილისში გამოჩენილი კომპოზიტორის მიქაელ ტარივერდიევის 85 წლის იუბილესთან დაკავშირებით 25 ოქტომბერს გალა-კონცერტი გაიმართება.
საღამო „მიქაელ ტარივერდიევი. დაიმახსოვრე ეს წამი“ ზაქარია ფალიაშვილის სახელობის თბილისის ოპერისა და ბალეტის სახელმწიფო თეატრის სცენაზე ჩატარდება.
საიუბილეო გალა-კონცერტში მონაწილეობას მიიღებენ მუსიკოსები: რუსი დირიჟორი და პედაგოგი ალექსანდრ პოლიანიჩკო, სოპრანო ტერმინე ზარიანი, რუსი პიანისტი ალექსეი გორიბოლი და ტრიო „მეირდიანი“.
სცენაზე ასევე გამოვა 16 წლის ქართველი პიანისტი და კომპოზიტორი, მრავალი საერთაშორისო კონკურსის ლაურეატი სანდრო ნებიერიძე.
გარდა ამისა, ღონისძიებაში მონაწილეობენ გრიბოედოვის სახელობის თბილისის რუსული დრამატული თეატრის მსახიობები, თბილისის ოპერისა და ბალეტის თეატრის ორკესტრი და სოლისტები.
საღამოზე ნაჩვენები იქნება ფრაგმენტები ცნობილი კინოფილმებიდან, რომლებისთვისაც მუსიკა მიქაელ ტარივერდიევმა დაწერა. ოპერის თეატრის ფოიეში გამოიფინება კომპოზიტორის ფოტოები, ხელნაწერები და აფიშები.
საღამოს ორგანიზატორები არიან ტარივერდიევის სახელობის საქველმოქმედო ფონდი და საერთაშორისო კულტურულ-საგანმანათლებლო კავშირი Русский клуб.
ტარივერდიევმა ერევნის კონსერვატორიაში წელიწადნახევარი ისწავლა, ხოლო შემდეგ მოსკოვში, გნესინების სახელობის მუსიკალურ-პედაგოგიურ ინსტიტუტში ჩააბარა, სადაც ცნობილი კომპოზიტორის არამ ხაჩატურიანის მოსწავლე იყო.
მის კალამს ეკუთვნის მუსიკა ისეთი კინოფილმებისთვის, როგორებიცაა „გაზაფხულის ჩვიდმეტი გაელვება“, „ბედის ირონია, ანუ გაამოთ“ და სხვა. სულ დაწერილი აქვს მუსიკა 130-ზე მეტი ფილმისთვის.
ტარივერდიევი 1996 წლის 25 ივლისს სოჭში გარდაიცვალა.
