თბილისი, 14 ოქტომბერი — Sputnik. საქართველოს პრემიერ-მინისტრმა ქვეყნის მოსახლეობას სვეტიცხოვლობა მიულოცა და მშვიდობა უსურვა.
საქართველოში 14 ოქტომბერს დიდი რელიგიური დღესასწაული — სვეტიცხოვლობა აღინიშნება. სვეტიცხოვლობა უფლის კვართისა და ბრწყინვალე და მირონმდინარე სვეტის დღესასწაულია. უფლის კვართი სვეტიცხოვლის საფუძველში ინახება.
„თქვენო უწმინდესობავ, პატივცემულო მოქალაქეებო, გილოცავთ დღევანდელ დღესასწაულს. გისურვებთ მშვიდობას, უკეთეს ხვალინდელ დღეს, უფლის წყალობას, ერთმანეთის სიყვარულს. მრავალს დაესწარით“, — განაცხადა კვირიკაშვილმა სვეტიცხოვლის საკათედრო ტაძარში, სადაც საზეიმო წირვა საქართველოს კათოლიკოს-პატრიარქმა ილია მეორემ აღავლინა.
წირვას მთავრობის სხვა წარმომადგენლებიც ესწრებოდნენ.
„სვეტიცხოვლობა ნამდვილად განსაკუთრებული დღესასწაულია, რომელიც ყოველთვის აერთიანებს საქართველოს. ეს დღესასწაული ჩვენი ხალხის, ჩვენი ეკლესიის, ჩვენი ქვეყნის ძალის სიმბოლოა“, — განაცხადა ეკონომიკის მინისტრმა დიმიტრი ქუმსიშვილმა.
„მინდა მივულოცო მთელ საქართველოს სვეტიცხოვლობის ბრწყინვალე დღესასწაული. სვეტიცხოვლობა ნამდვილად არის გამორჩეული დღესასწაული, რომელიც ყოველთვის იყო მთელი საქართველოს გამაერთიანებელი. ეს არის დღესასწაული, რომელიც ჩვენი ერის, ჩვენი ეკლესიის, ჩვენი ქვეყნის სიძლიერის სიმბოლოა“, — განაცხადა საქართველოს შს მინისტრმა გიორგი მღებრიშვილმა.
„გილოცავთ ყველას. ვულოცავ მთელ ჩვენს ქვეყანას, ახალგაზრდებს, ძველგაზრდებს, ყველას. ეს არის ფესვი ჩვენი კულტურისა, ეს არის საფუძველი ჩვენი ერის. ნათქვამია, რომ აქ ასვენია საქართველოს ცხელი გული. მე ამის გულწრფელად მჯერა და ყველას გილოცავთ“, — განაცხადა განათლებისა და მეცნიერების მინისტრმა ალექსანდრე ჯეჯელავამ.
14 ოქტომბერი ქვეყანაში უქმე დღედ არის გამოცხადებული.
