თბილისი, 13 ოქტომბერი— Sputnik. საქართველომ და ყირგიზეთმა ხელი მოაწერეს "შემოსავლებზე ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ“ შეთანხმებას.
დოკუმენტი გაფორმდა ორი ქვეყნის მთავრობებს შორის საქართველოში ყირგიზეთის რესპუბლიკის პრეზიდენტის ალმაზბეკ ატამბაევის ორდღიანი ოფიციალური ვიზიტის ფარგლებში.
შეთანხმების მთავარი მიზანია, ხელი შეუწყოს ქვეყნებს შორის ეკონომიკური თანამშრომლობის გაღრმავებასა და ინვესტიციების მოზიდვას, ნათქვამია საქართველოს ფინანსთა სამინისტროს განცხადებაში.
დოკუმენტი ასევე ითვალისწინებს საგადასახადო საკითხებში თანამშრომლობას და საგადასახადო მიზნებისათვის ინფორმაციის გაცვლის ახალი სტანდარტების დანერგვას.
ამჟამად, ორმაგი დაბეგვრის თავიდან აცილებისა და გადასახადების გადაუხდელობის აღკვეთის შესახებ შეთანხმება ძალაშია 52 ქვეყანასთან.
