თბილისი, 25 სექტემბერი — Sputnik. პროექტ „ახალი ტფილისის“ ფარგლებში 2016 წლის თებერვალში დაწყებული სარეაბილიტაციო სამუშაოები აღმაშენებლის გამზირზე, დასრულდა, იუწყება თბილისის მერიის პრესსამსახური.
გამზირის გახსნის საზეიმო ცერემონია დღეს, 25 სექტემბერს გაიმართა, რომელსაც საქართველოს პრემიერ-მინისტრი გიორგი კვირიკაშვილი, თბილისის მერი დავით ნარმანია და ასევე თბილისის მოსახლეობა დაესწრნენ.
თბილისის მერიის და თბილისის განვითარების ფონდის პროექტ „ახალი ტფილისის" I ეტაპის სამუშაოები 2016 წლის თებერვალში დაიწყო და რეაბილიტაცია სხვადასხვა მიმართულებით ჩატარდა. პროექტზე საერთო ჯამში 30 მილიონ ლარამდე დაიხარჯა.
პროსპექტზე მთლიანად გამოიცვალა საკომუნიკაციო სისტემა — გაზისა და წყლის მილები, ინტერნეტ- და ელექტროგაყვანილობა. მოეწყო სადრენაჟე და სანიაღვრე სისტემა.
აღსანიშნავია, რომ აღმაშენებლის №59-ში მდებარე შენობაზე მოეწყო ვერტიკალური ბაღი, დაირგო ხეები, კეთილმოეწყო ორი სკვერი, ხოლო შენობების ფასადები დეკორატიული მცენარეებით მოირთო.
აღმაშენებლის გამზირზე რეაბილიტაციის დასრულების შემდეგ, ფოსტიდან ზაარბრიუკენის მოედნამდე მონაკვეთი მანქანებისთვის დაიკეტება და ღია კაფეები მოეწყობა.
