თბილისი, 15 სექტემბერი — Sputnik. საქართველოს ნაკრებმა ფეხბურთში ფიფა/კოკა-კოლას ახალ რეიტინგში 19 საფეხურით გაიუარესა მდგომარეობა და ახლა მას 137-ე ადგილი უკავია. რეიტინგი გამოქვეყნებულია ორგანიზაციის ოფიციალურ ვებგვერდზე.
საქართველოს ეროვნული გუნდის აქტივში 240 ქულაა და ამ მაჩვენებლით ის ტაილანდსა და პუერტო-რიკოს შორის განთავსდა.
ნაკრების რეგრესი, უპირველესად, სექტემბრის დასაწყისში საკუთარ მოედანზე, 2018 წლის მსოფლიო ჩემპიონატის შესარჩევი ციკლის ფარგლებში ავსტრიის ნაკრებთან გამართულ მატჩში ანგარიშით 1:2 წაგებას უკავშირდება.
მსოფლიოს უძლიერესი ნაკრებების რეიტინგს უწინდებურად არგენტინა უდგას სათავეში. არგენტინელებს 1646 ქულა აქვთ და მეორე ადგილზე გასულ ბელგიას თითქმის 300 პუნქტით უსწრებენ წინ. მესამე ადგილზე გერმანიის ნაკრებია.
ფიფა/კოკა-კოლას რეიტინგის პირველი ათეული:
1. არგენტინა
2. ბელგია
3. გერმანია
4. კოლუმბია
5. ბრაზილია
6. ჩილე
7. პორტუგალია
8. საფრანგეთი
9. ურუგვაი
10. უელსი
საქართველოს ნაკრების მეტოქეები 2018 წლის მსოფლიო ჩემპიონატზე D ჯგუფში ფიფას რეიტინგში:
10. უელსი
26. ავსტრია
31. ირლანდია
50. სერბეთი
161. მოლდოვა
მსოფლიო ჩემპიონატის შემდეგ საკვალიფიკაციო მატჩებს საქართველოს ნაკრები ოქტომბრის დასაწყისში ბრიტანეთის კუნძულებზე გამართავს: 6 ოქტომბერს ირლანდიის, ხოლო 9 ოქტომბერს — უელსის წინააღმდეგ.
