თბილისი, 1 სექტემბერი — Sputnik. ძლიერი წვიმის შედეგად ბათუმის ქუჩები დაიტბორა, ხოლო შტორმი ზღვისპირეთში 4-5 ბალს აღწევს.
შტორმი დღესაც შენარჩუნდება და ხვალ, 2 სექტემბერს თანდათან ჩაცხრება, იუწყება საინფორმაციო სააგენტო „ნოვოსტი-გრუზია“ გარემოს დაცვის ეროვნულ სააგენტოზე დაყრდნობით.
ბათუმში სპეციალური სამსახურები მუშაობენ. ისინი ქალაქის ქუჩებს აწესრიგებენ, განაცხადეს ქალაქის მერიაში.
უამინდობამ პრობლემები შექმნა დაბა ჩაქვში. დუმბაძის ქუჩაზე ექვსი ოჯახის სახლები დაიტბორა, ხოლო დილით ბათუმი-ქობულეთი-ჩაქვის გზის მონაკვეთზე ადიდებული მდინარე გადმოვიდა და ცენტრალური გზა დატბორა.
გზაზე შეზღუდვა დიდხანს არ გაგრძელებულა, რადგან სამაშველო ბრიგადამ პრობლემის აღმოფხვრა მალევე შეძლო. ამის შემდეგ სატრანსპორტო მოძრაობა აღდგა, განაცხადეს ჩაქვის გამგეობაში.
