თბილისი, 31აგვისტო — Sputnik. ერთლარიანი მონეტების უკანონო დამზადების ბრალდებით საქართველოს ფინანსთა სამინისტროს საგამოძიებო სამსახურის თანამშრომლებმა გიორგი ხუციშვილი დააკავეს, აღნიშნულია უწყების პრეს-სამსახურის განცხადებაში.
სამართალდამცველების ინფორმაციით, ხუციშვილი მონეტებს სახლში ამზადებდა. ამისთვის კი სპეციალურ დანადგარსა და სხვადასხვა ფერადი ლითონების შენადნობს იყენებდა.
ყალბ მონეტებს ის საქართველოს მასშტაბით სწრაფი გადახდის აპარატების მეშვეობით ასაღებდა. ყალბი მონეტების ზუსტი რაოდენობა განცხადებაში დაზუსტებული არ არის.
დანაშაულებრივ ფაქტზე გამოძიება მიმდინარეობს საქართველოს სისხლის სამართლის კოდექსის 212-ე მუხლის მეორე ნაწილით – „ყალბი ფულის ან ფასიანი ქაღალდის დამზადება ან გასაღება“, რაც ითვალისწინებს თავისუფლების აღკვეთას 7-დან 10 წლამდე ვადით.
