თბილისი, 23 აგვისტო — Sputnik. მმართველმა პარტიამ „ქართული ოცნება — დემოკრატიული საქართველო“ პარტიების რეიტინგში პირველი ადგილი დაიკავა. რეიტინგი მსოფლიოში ერთ-ერთმა მსხვილმა კვლევითმა კომპანია GFK-მ საპარლამენტო არჩევნებამდე თვენახევრით ადრე ჩაატარა.
GFK-ს კვლევების შესახებ სიუჟეტი ტელეკომპანია „რუსთავი2“-მა აჩვენა.
პარტიების რეიტინგი შეიქმნა გამოკითხვის შედეგად, რომელიც 2-18 აგვისტოს პერიოდში პირდაპირი ინტერვიუს წესით ჩატარდა. მონაწილეობდა 2 200 ადამიანი მთელი საქართველოს მასშტაბით. გამოკითხვის ცდომილება 2,1%-ია.
რეიტინგის სათავეშია „ქართული ოცნება — დემოკრატიული საქართველო“ – 35,9%, მეორე ადგილზეა „ერთიანი ნაციონალური მოძრაობა“ – 34,2%, მესამეზე — პაატა ბურჭულაძის „მოძრაობა — სახელმწიფო ხალხისთვის“ – 9,8%.
მას 5,4%-ით მოსდევს შალვა ნათელაშვილის „ლეიბორისტული პარტია“ და 4,5%-ით ირაკლია ალასანიას „თავისუფალი დემოკრატები“.
რეიტინგში შემდეგია ირმა ინაშვილის „საქართველოს პატრიოტთა ალიანსი“ 2,4%-ით და ნინო ბურჯანაძის „გაერთიანებული დემოკრატიული მოძრაობა“ 2,2%-ით.
შემდეგ მოდიან: „რესპუბლიკური პარტია“ (0.7%), „პოლიტიკური ცენტრი გირჩი“ (0.5%), „ახალი საქართველო — გიორგი ვაშაძე“ (0.5%).
საპარლამენტო არჩევნები საქართველოში 8 ოქტომბერს გაიმართება.
