თბილისი, 12 აგვისტო — Sputnik. საქართველოს პრემიერ-მინისტრი გიორგი კვირიკაშვილი დიდგორის ველზე საზეიმო ღონისძიებებს დაესწრო.
დიდგორობა ყოველ წელს 12 აგვისტოს აღინიშნება. 1121 წელს ამ დღეს ქართველებმა დავით აღმაშენებლის მეთაურობით თურქ-სელჩუკების გაერთიანებულ ჯარს სძლიეს.
სახალხო დღესასწაულის ფარგლებში გაიმართა კონცერტი, სპორტული შეჯიბრებები, ბაზიერების შოუ.
საქართველოს თავდაცვის მინისტრმა ლევან იზორიამ დიდგორის მემორიალთან გამართულ ღონისძიებაზე საბრძოლო მოქმედებების დროს გამოჩენილი მამაცობისა და თანამებრძოლთა სიცოცხლის გადარჩენისთვის „დიდგორის ჯვრის“ მედლებით დააჯილდოვა მაიორი ზაზა ცერცვაძე და სერჟანტი გიორგი ჭოველიძე.
„დიდგორის ჯვრის“ მედლით დაჯილდოება თავდაცვის მინისტრის ბრძანებით 2014 წელს დაწესდა. მას თავდაცვის სამინისტროს სამხედრო მოსამსახურეებს საომარი მოქმედებების დროს გაბედული მოქმედებებისთვის გადასცემენ.
