თბილისი, 1 აგვისტო — Sputnik. საქართველოს რაგბის ნაკრების წევრის მერაბ კვირიკაშვილის მეუღლე ანანო ბუაძე გუშინ ქუთაისის საავადმყოფოში გარდაიცვალა, იუწყება რადიოსადგური „პირველი რადიო“.
ავტოავარია, რომელშიც BMW და Nissan Tiida-ს მარკის ავტომობილები შეეჯახნენ ერთმანეთს, ქუთაისი-სამტრედიის შემოვლით გზაზე მოხდა. სამი ადამიანი, მათ შორის — ცოლ-ქმარი — ადგილზე გარდაიცვალა.
როგორც ექიმებმა განაცხადეს, ავარიიდან მეცხრე დღეს ბუაძეს ფილტვებთან დაკავშირებით პრობლემები შეექმნა და მისი გადარჩენა ვერ მოხერხდა. ბუაძეს ოთხი შვილი დარჩა.
სხვა დაშავებულების — თავად კვირიკაშვილის, კლუბ „ლელოს“ მოთამაშე გიორგი ლომინაძისა და მისი მეუღლის მდგომარეობა დამაკმაყოფილებელია.
სისხლის სამართლის საქმე აღძრულია სსკ-ის მუხლით „საგზაო მოძრაობის ან ტრანსპორტის ექსპლუატაციის წესების დარღვევა“.
