თბილისი, 31 ივლისი — Sputnik. ცნობილი რუსი პოეტი და მწერალი ფაზილ ისკანდერი 88 წლის ასაკში მოსკოვში გარდაიცვალა, იუწყება სააგენტო „რია ნოვოსტი“ ტელეარხ „როსია 24“-ზე დაყრდნობით.
ფაზილ ისკანდერი სოხუმში 1929 წელს დაიბადა. თავისი შემოქმედებით ის ცნობილი გახდა როგორც პოეტი და პროზაიკოსი. მის კალამს ეკუთვნის: „ადამიანი და მისი სამეზობლო“, „ჰერაკლეს მეცამეტე გმირობა“, „სოფიჩკა“, „პოეტი“, „კურდღლები და გველები“,“დასაწყისი“ და სხვა. მისი ნაწარმოებების მიხედვით გადაღებულია ფილმები და თეატრალური დადგმები.
ისკანდერს მრავალი სახელმწიფო ჯილდო აქვს მიღებული, მათ შორის „ სამშობლოს წინაშე დამსახურებისთვის“ II ხარისხის ორდენი, რუსეთის ფედერაციის სახელმწიფო პრემია, სსრკ-ს სახელმწიფო პრემია. მოსკოვის ერთ-ერთ ბიბლიოთეკას მისი სახელი ეწოდა, ასევე მის საპატივცემულოდ ერთ-ერთ პატარა პლანეტას მისი სახელი დაარქვეს.
