თბილისი, 27 ივლისი — Sputnik. მოსკოვის თეატრის Театр на Юго-Западе დასი ბათუმში მაყურებლის წინაშე 6 აგვისტოს წარდგება სპექტაკლით „ოსტატი და მარგარიტა“.
როგორც Sputnik-თან ღონისძიების ორგანიზატორებმა განაცხადეს, ბათუმის სახელმწიფო მუსიკალური ცენტრის სცენაზე მიხეილ ბულგაკოვის მისტიკური რომანის ინტერპრეტაციას რეჟისორი ვალერი ბელიაკოვიჩი წარმოადგენს.
„სპექტაკლი „ოსტატი და მარგარიტა“ უკვე 10 წლისაა. და მან დიდი ხანია დაიმსახურა დსთ-ის ქვეყნებსა და დასავლეთში ყველაზე პოპულარული სპექტაკლის რეპუტაცია, რომელმაც მაყურებლის მოთხოვნის და სალაროს შემოსავლის ყველა რეკორდი მოხსნა. „ოსტატი და მარგარიტა“ – 21-ე საუკუნის თეატრალური ხელოვნების შედევრია“, — ნათქვამია თეატრის ვებ-გვერდზე.
დადგმაში ვოლანდის როლს რუსეთის სახალხო არტისტი ვლადიმირ სტეკლოვი ასრულებს.
სპექტაკლი 20:00 საათზე დაიწყება და მასზე დასასწრებად ასაკობრივი შეზღუდვაა დაწესებული 16+.
მოსკოვის დამოუკიდებელი თეატრი 2003 წელს დაარსდა. ამ მოკლე პერიოდში თეატრმა თაყვანისმცემელთა მრავალრიცხოვანი არმია და რუსეთში ერთ-ერთი ყველაზე წარმატებული თეატრალური პროექტის სტატუსი შეიძინა.
პირველი სეზონი თეატრმა „ოსტატი და მარგარიტას” ჩვენებით გახსნა და იმ პერიოდიდან დღემდე სპექტაკლი 700-ჯერ არის ნაჩვენები მსოფლიოს სხვადასხვა ქვეყნებში.
