თბილისი, 25 ივლისი — Sputnik. საქართველოში წელს პირველად ტარდება საერთაშორისო ოლიმპიადა ქიმიაში.
„ოლიმპიადა 2016“, რომელშიც მსოფლიოს 75 ქვეყნის 700-მდე წარმომადგენელი იღებს მონაწილეობას, 23 ივლისს გაიხსნა და 1 აგვისტომდე გაგრძელდება.
„ეს არის ძალიან დიდი შესაძლებლობა, ვაჩვენოთ მსოფლიოს საქართველო, მისი კულტურა და მდიდარი ისტორიული მემკვიდრეობა", — ნათქვამია საქართველოს განათლებისა და მეცნიერების სამინისტროს "ფეისბუქის" ოფიციალურ გვერდზე გავრცელებულ განცხადებაში.
საქართველო უკვე რამდენიმე წელია მონაწილეობს ქიმიის საერთაშორისო ოლიმპიადაში, თუმცა თავად მსგავსი მასშტაბური ღონისძიების ჩატარების შესაძლებლობა წელს პირველად მიეცა.
ქიმიის საერთაშორისო ოლიმპიადის მასპინძლობის უფლება ქვეყნებს 10 წელიწადში ერთხელ ეძლევათ. ამჟამად განრიგი წინასწარაა შედგენილი 2021 წლამდე.
