თბილისი, 19 ივლისი — Sputnik. ლუბლიანაში, თბილისის ქუჩაზე სკვერის გახსნის ცერემონია სამშაბათს გაიმართა. სკვერში საქართველოსა და სლოვენიის „მეგობრობის სკამი“ დადგეს, აღნიშნულია საქართველოს პრეზიდენტის ადმინისტრაციის ვებ-გვერდზე.
ღონისძიება საქართველოს პრეზიდენტის გიორგი მარგველაშვილის ლუბლიანის მერთან ზორან იანკოვიჩთან შეხვედრის შემდეგ გაიმართა. პრეზიდენტი სლოვენიაში ოფიციალური ვიზიტით იმყოფება.
საქართველოს პრეზიდენტმა აღნიშნა, რომ მისასალმებელია თანამშრომლობა დაძმობილებულ ქალაქებს — თბილისი–ლუბლიანასა და ქუთაისი–მარიბორს შორის.
მარგველაშვილი სლოვენიაში ორდღიანი ოფიციალური ვიზიტით გუშინ გაემგზავრა. ეს დამოუკიდებელი საქართველოს ისტორიაში სახელმწიფოს მეთაურის პირველი ვიზიტია სლოვენიაში.
ვიზიტის ფარგლებში საქართველოს პრეზიდენტი შეხვდა სლოვენიის პრეზიდენტს ბორუტ პაჰორს, რომელიც უახლოეს მომავალში საქართველოს ეწვევა, ასევე ინფრასტრუქტურის მინისტრს პიტერ გასპერსიჩსა და ეროვნული ასამბლეის პრეზიდენტს მილან ბრგლეზს.
ოფიციალური ვიზიტის ფარგლებში გიორგი მარგველაშვილმა ასევე გამართა შეხვედრები სლოვენიის პრემიერ-მინისტრთან მირო ცერართან.
საქართველოს ევროპული და ევროატლანტიკური ინტეგრაციის პროცესის ხელშეწყობისა და განვითარების მიზნით შეხვედრისას მხარეებმა სხვადასხვა სამინისტროს შორის თანამშრომლობისა და სლოვენიის გამოცდილების გაზიარებასთან დაკავშირებით ინტერესი გამოხატეს.
შეხვედრაზე მხარეებმა აღნიშნეს, რომ მზად არიან სავაჭრო და ეკონომიკური თანამშრომლობის გაძლიერებისათვის.
პრეზიდენტის ვიზიტი სლოვენიაში დღეს სრულდება.
