თბილისი, 13 ივნისი — Sputnik. საქართველოს პარლამენტის ბიურომ რეგისტრაციაში გაატარა საკანონმდებლო ცვლილებათა პაკეტი, რომელიც საზოგადოებრივი თავშეყრის ადგილებში სიგარეტის მოწევის სრულ აკრძალვას ითვალისწინებს.
ცვლილებების ინიციატორი დეპუტატი გუგული მაღრაძე გახლავთ, რომელიც სიგარეტის მოწევის აკრძალვას ყველა სახის საზოგადოებრივ ტრანსპორტსა და ასევე ყველა შენობაში მოითხოვს, გარდა საცხოვრებელი ბინებისა და სასჯელაღსრულების დაწესებულებებისა.
„აკრძალვა ეხება რესტორნებს, სასტუმროებს, კაფე-ბარებსა და ასე შემდეგ. ჩვენ ეს მოთხოვნები კანონში შეგვაქვს, მაგრამ ვადას 2018 წლის 1 იანვრამდე ვიძლევით, რათა მათ ან სპეციალური ადგილების გამოყოფა შეძლონ მოწევისთვის, ან მოწევის სრულად აკრძალვა“, — აცხადებს მაღრაძე.
კანონპროექტი ასევე ითვალისწინებს თამბაქოს ნაწარმისა და აქსესუარების ვიტრინებში, ვიტრაჟებზე, დახლებზე, თაროებსა და სხვა გამოსაჩენ ადგილებზე განთავსებას.
ცვლილებების თანახმად, საგანმანათლებლო და აღმზრდელობითი დაწესებულებიდან თამბაქოს ნაწარმის სარეალიზაციო პუნქტებამდე მანძილი 50 მეტრიდან ას მეტრამდე უნდა გაიზარდოს.
კანონპროექტი უკვე განთავსებულია პარლამენტის ოფიციალურ ვებგვერდზე.
დღეისათვის საქართველოში სიგარეტის მოწევა აკრძალულია საჯარო, სამედიცინო და საგანმანათლებლო დაწესებულებებში.
მსოფლიო ჯანდაცვის ორგანიზაციის კვლევების თანახმად, თამბაქოს ნაწარმის მოხმარების შედეგად, საქართველოში ყოველწლიურად 11 ათასი ადამიანი იღუპება, რაც დღეში 30 გარდაცვლილს უდრის.
