თბილისი, 13 ივნისი — Sputnik. სეულში (სამხრეთ კორეა) ერთ-ერთ დიდ გამოფენაზე — KOTFA 2016 აჭარის ტურისტული პოტენციალი წარადგინეს, აღნიშნულია აჭარის მთავრობის ვებგვერდზე განთავსებულ განცხადებაში.
ღონისძიების სტუმრები გაეცნენ სარეკლამო-საინფორმაციო მასალებს, მიიღეს დეტალური ინფორმაცია აჭარის ტურისტული პროდუქტების შესახებ და დააგემოვნეს ქართული ღვინო.
საქართველოს ტურისტული პოტენციალის შესახებ დიდი სტატიის მომზადებას აპირებს გაზეთი Korea Times.
KOTFA-ში მონაწილეობა აჭარის ტურიზმისა და კურორტების დეპარტამენტმა პირველად მიიღო.
აჭარაში საზაფხულო ტურისტული სეზონი 28 მაისს გაიხსნა.
ტურიზმის დეპარტამენტი რეგიონისა და დაგეგმილი კულტურულ-გასართობი ღონისძიებების პოპულარიზებას ათ მიზნობრივ ქვეყანაში აქტიურად ახორციელებს. ეს ქვეყნებია თურქეთი, აზერბაიჯანი, სომხეთი, რუსეთი, უკრაინა, ისრაელი, პოლონეთი, ლიტვა, ყაზახეთი და ბელარუსი.
