თბილისი, 2 ივნისი — Sputnik. საერთაშორისო ოლიმპიურმა კომიტეტმა რიოს ოლიმპიადაში მონაწილე ქართველ სპორტსმენებს რეკომენდაციით მიმართა, რომელიც სპორტსმენებმა ბრაზილიაში ყოფნის განმავლობაში ზიკას ვირუსის გავრცელების გამო უნდა გაითვალისწინონ.
5-21 აგვისტოს პერიოდში რიო-დე-ჟანეიროში ზაფხულის XXXI ოლიმპიური თამაშები ჩატარდება. ამ ეტაპზე საქართველოდან ოლიმპიური თამაშების ლიცენზია 38-მა სპორტსმენმა მოიპოვა.
ჯანდაცვის მსოფლიო ორგანიზაციის ბოლო ანგარიშის თანახმად, ოლიმპიური თამაშების სხვა ადგილზე გადატანის აუცილებლობა არ არსებობს.
საერთაშორისო ოლიმპიური კომიტეტი საქართველოს ოლიმპიურ კომიტეტს თხოვნით მიმართავს ყურადღებით გაეცნონ სამედიცინო რჩევებს და შესაბამისი ინფორმაცია ოლიმპიური დელეგაციის წევრებს გადასცენ, რათა მათი ბრაზილიაში ყოფნა უსაფრთხო იყოს, ნათქვამია წერილში.
საერთაშორისო ოლიმპიური კომიტეტი ჯანდაცვის მსოფლიო ორგანიზაციასთან და ასევე „რიო 2016“-ის საორგანიზაციო კომიტეტთან მჭიდროდ ურთიერთობს და ზიკას ვირუსის გავრცელებასთან დაკავშირებით, რეგულარუად ახორციელებს ბრაზილიაში არსებული ვითარების მონიტორინგს.
