თბილისი. 29 მაისი — Sputnik. გასული წლის 14 ივნისის ღამეს მდინარე ვერეს წყალდიდობით დაზიანებულ ხეობაში თბილისის მერია ათი ათასამდე ხეს დარგავს, იუწყება თბილისის მერიის პრეს-სამსახური.
2015 წელს 14 ივნისის ღამეს მდინარე ვერეს ადიდების შედეგად ხეობაში არსებული ყველა მწვანე ნარგავები განადგურდა. ნაპირებიდან გადმოსულმა მდინარემ დატბორა თბილისის ზოოპარკი, პარკი „მზიური“, პარკთან და სვანიძის ქუჩასთან ახლოს მდებარე შემოვლითი გზა.
ერთი წლის შემდეგ გზა აღდგენილია და თბილისის მერიის თანამშრომლები ხეობაში წიწვოვანი ხეების ნერგებს და ბუჩქებს რგავენ. თბილისის მერის განცხადებით, ტერიტორიის გამწვანება უახლოეს დღეებში დასრულდება.
გარდა ამისა, მერია მუშაობს პროქეტზე, რომელიც ხეობას განმეორებითი წყალდიდობისგან დაიცავს.
„ჩვენ ვგეგმავთ მდინარის კალაპოტის ფორმირებასაც, რაც შემდგომში უსაფრთხოს გახდის მდინარეს და მის მიმდებარე ტერიტორიას. პროექტი ამ მიმართულებით უკვე მზად არის და მის განხორციელებას მერია ინფრასტრუქტურის სამინისტროსთან ერთად გეგმავს“ — განაცხადა ნარმანიამ.
2015 წელს 14 ივნისის ღამის წყალდიდობამ 19 ადამიანის სიცოცხლე შეიწირა, ათობით ოჯახი უსახლკაროდ დარჩა. აბობოქრებული სტიქიის ეპიცენტრში აღდგენითი სამუშაოები დღესაც მიმდინარეობს.
