თბილისი, 17 მაისი — Sputnik. ერაყის დედაქალაქში მომხდარი ორი აფეთქების შედეგად დაღუპულთა რიცხვმა 44-ს მიაღწია, მათგან 38 ქალაქის ჩრდილოეთით, ბაზარში აფეთქებისას დაიღუპა, იტყობინება სააგენტო РИА Новости რეიტერზე დაყრდნობით.
სააგენტოს მონაცემებით, პირველი აფეთქების შედეგად 38 ადამიანი დაიღუპა და 50-ზე მეტი დაშავდა. მეორე აფეთქების მსხვერპლი ექვსი ბაღდადელი გახდა და 21-მა მძიმე დაზიანება მიიღო.
ერაყში რთული სიტუაციაა უსაფრთხოების თვალსაზრისით, „ისლამური სახელმწიფოს“ აქტივობის გამო. ბაღდადსა და მეზობელ რაიონებში, მუდმივად ხდება აფეთქებები, იღუპება მშვიდობიანი მოსახლეობა და სამართალდამცავები. ოთხშაბათს ერაყის დედაქალაქში აფეთქებების სერია მოხდა, რომლის შედეგადაც 94 ადამიანი დაიღუპა და 150 დაშავდა. პასუხისმგებლობა ტერაქტებზე „ისლამურმა სახელმწიფომ“ აიღო.
