თბილისი, 8 მაისი — Sputnik. ჩვენ კიდევ ერთ ახალ ნაბიჯს ვდგამთ ევროპული სახელმწიფოს შექმნისკენ, განაცხადა საქართველოს პრეზიდენტმა თბილისში „ევროპული დღეების“ გახსნის ოფიციალურ ცერემონიაზე.
ევროპის დღეები საქართველოში 8 მაისს დაიწყო — რიყის პარკში ევროსოფელი გაიხსნა, სადაც ევროკავშირის ქვეყნების კუთხეებია წარმოდგენილი. „ევროპის დღეები“ 24 მაისამდე გაგრძელდება.
„დღეს ჩვენ კიდევ ერთი მნიშვნელოვანი ნაბიჯი უნდა გადავდგათ დამოუკიდებლობიდან თავისუფლებისაკენ. თავისუფლებისკენ ნაბიჯის გადადგმა ნიშნავს, რომ შენ შექმნი შენსას, უნიკალურს, განსაკუთრებულს, თანამედროვეს. ჩვენ დღეს ახალ ნაბიჯს ვდგამთ ევროპული ქვეყნის შექმნის თვალსაზრისით“, — განაცხადა მარგველაშვილმა.
საქართველო შეიძლება გამთლიანდეს არა ომით, არამედ განსაკუთრებული თავისუფლების შექმნით, დასძინა მან.
სტუმრებსა და თბილისელებს ცნობილი ქართველი და ევროპელი შემსრულებლების კონცერტი ელოდებათ, რომელშიც მონაწილეობას მიიღებენ „ევროვიზიის“ ყოფილი მონაწილეები ნინა სუბლატი და ჯგუფი Eldrine.
შეკრებილთა წინაშე წარდგება ქართული ნაციონალური ბალეტი „სუხიშვილები“, იტალიელი ტენორი პიერ მაცოკეტი, ჯგუფი „ნიუტონი“ და სხვები.
