სიტყვა „სუკულენტის“ განმარტება ძალზე მარტივია — ეს არის მცენარეთა ჯგუფი გამსხვილებული, პუტკუნა ფოთლებით ან ღეროებით, რომლებმაც ფოთლები ჩაანაცვლეს. რთულია გაავლო ზღვარი იმ მცენარეებს შორის, რომლებიც სუკულენტებად მოიაზრებიან და მცენარეთა სხვა ჯგუფებს შორის, რადგან მცენარეთა თითქმის 40-მდე ოჯახში, ერთი სუკულენტი მაინც არის.
მეყვავილეთა შორის ყველაზე გავრცელებულ სუკულენტებად ითვლებიან: ეჩევერია (ქვის ვარდი), კრასულა (მსუქანა), სედუმი, კალანხოე, ალოე, ეპიფილუმი (კაქტუსი).
ბუნებაში არსებული ასობით სუკულენტი, ძლიერ განსხვავდება ერთმანეთისაგან ფორმითა და ზომით. მათ უმრავლესობას როზეტის ფორმა აქვს, რადგან ფოთლების მიჯრით განლაგება ხელს უწყობს უდაბნოს პირობებში მათში წყლის შენარჩუნებას.
მიუხედავად ამ განსხვავებებისა, მათ საერთო მოთხოვნები აქვთ, რაც სწორედ მათ საერთო საარსებო გარემოს უკავშირდება მთელ დედამიწაზე — ისინი ძირითადად მშრალ კლიმატში ხარობენ.
ტემპერატურა: თუ სუკულენტების ქონა გადაწყვიტეთ, უნდა იცოდეთ, რომ მათ, გაზაფხულიდან შემოდგომამდე ზომიერი —24-28 გრადუსი ტემპერატურა სჭირდებათ. ზამთარში კი ცოტა დაბალ ტემპერატურას საჭიროებენ — იდეალურია +10, +13 გრადუსი, თუმცა +4 გრადუსამდე ხანმოკლე შეციებასაც ადვილად აიტანენ.
განათება: მზის სხივებს სუკულენტებისათვის სასიცოცხლო მნიშვნელობა აქვთ, ამიტომ სამხრეთის ფანჯრები ოთახის სუკულენტებისათვის იდეალური ადგილია. უფრო მეტიც, მზის სხივებზე „დაბრაწული“ სუკულენტები საოცარ შეფერილობას იძენენ. აქვე გაითვალისწინეთ, რომ არსებობენ ისეთებიც, რომელთაც ზაფხულში მწველი მზის სხივები მაინცდამაინც არ სიამოვნებთ — მაგალითად ხავორტია, ამიტომ ასეთი სუკულენტები შუადღის მზეს უნდა მოარიდოთ.
მორწყვა: გაზაფხულიდან შემოდგომამდე ისევე საჭიროებენ მორწყვას, როგორც სხვა ქოთნის მცენარეები — როგორც კი შეატყობთ, რომ გრუნტი გამოშრა, საფუძვლიანად მორწყეთ. ზამთარში კი თვეში 1-2 მორწყვა სრულიად საკმარისია.
ჰაერის ტენიანობა: არ არის საჭირო ფოთლების დანამვა, მთავარი მოთხოვნა სუფთა ჰაერია, ამიტომ თუ საშუალება არ გაქვთ გაზაფხულიდან შემოდგომამდე ეზოში ან აივანზე გყავდეთ, ოთახი ხშირად გაანიავეთ.
სუკულენტების გამრავლება: ეს ის შემთხვევაა, როცა სხვა მცენარეებისაგან განსხვავებით, გამრავლების პროცესი ძალზე მარტივია. ძალიან ბევრი მათგანი უბრალოდ ჩამოცვენილი ფოთლებიდან მრავლდება. მოატეხეთ ფოთოლი და ჩარგეთ პირდაპირ მიწაში — ძალიან მალე — 2-3 კვირაში ფოთლებს ფესვები გამოუვათ და ახალ შვილობილ მცენარეს მიიღებთ. მრავლდება ასევე გვერდითა ტოტებიდანაც, იგივე მეთოდით. სუკულენტების წყალში დაფესვიანება არ არის რეკომენდირებული — ლპობას იწყებენ. ახლად მოტეხილი ფოთლები და ტოტები ჯერ შეაშრეთ და შემდეგ ჩარგეთ. კარგია თუ დაფესვიანებისათვის სპეციალურ სტიმულატორებს გამოიყენებთ. ასე დაფესვიანებული ზოგიერთი სუკულენტი უკვე 2 თვეში ზრდასრული მცენარე ხდება, ზოდს კი ამისათვის ერთი წელი სჭირდება.
სუკულენტების გამრავლებისათვის ყველაზე კარგი პერიოდია გაზაფხული — ამ დროს ადვილად ფესვიანდებიან და ტანს მალე იყრიან.
არსებობს 6 მარტივი წესი სუკულენტების მოვლისათვის:
1. არ დაუშვათ გრუნტის მაღალი ტენიანობა, აუცილებელია მორწყვებს შორის მისი შეშრობა.
2. გადარგვისას გრუნტს ნახშირი დაამატეთ.
3. ქოთნის ძირში აუცილებლად გაითვალისწინეთ დრენაჟი.
4. ზამთარში დაიცავით მორწყვის სწორი რეჟიმი
5. გაამრავლეთ მხოლოდ გაზაფხულზე, ამასთან არ დაგავიწყდეთ მასალის წინასწარ შეშრობა.
6. მცენარეებს კარგად განათებული, მზიანი ადგილი შეურჩიეთ.
და ბოლოს — სუკულენტები ის მასალაა, რომელთაგან საოცარი კომპოზიციების შექმნა შეიძლება არა მხოლოდ ბაღებში და აივნებზე, არამედ უმცირეს კოლბებშიც, რომელსაც ხელის გულზეც კი დაიტევთ. მთავარია მონდომება და ფანტაზიის უნარი, მცენარე კი ამაში ხელს ნამდვილად შეგიწყობთ.
