თბილისი, 23 აპრილი — Sputnik. საქართველო თავისუფალი მაშინ გახდება, როდესაც ის ევროპულ სახელმწოფოს შექმნის, განაცხადა საქართველოს პრეზიდენტმა გიორგი მარგველაშვილმა პარიზში, საქართველოს დამოუკიდებლობის აღდგენის 25 წლისთავთან დაკავშირებით გამართულ საზეიმო მიღებაზე.
„ჩვენ გავხდით დამოუკიდებელი, მაგრამ თავისუფალი სწორედ მაშინ გახდება საქართველო, როცა თავის ბუნებრივ იდენტობას განხორციელებს და ბუნებრივად შექმნის ევროპულ სახელმწიფოს",- აღნიშნა საქართველოს პრეზიდენტმა, იუწყება პრეზიდენტის პრეს-სამსახური.
საზეიმო მიღებას, რომელიც საფრანგეთში საქართველოს საელჩოს ორგანიზებით მოეწყო, საქართველოს პრეზიდენტი პირველ ლედისთან, მაკა ჩიჩუასთან ერთად ესწრებოდა. საზეიმო მიღებაზე იმყოფებოდნენ საქართველოს პირველი რესპუბლიკის მთავრობის წევრების შთამომავლები, საფრანგეთში აკრედიტებული დიპლომატიური კორპუსის წარმომადგენლები, საფრანგეთში მცხოვრები დიასპორის წარმომადგენლები და საზოგადო მოღვაწეები.
საღამოზე კონცერტი გამართა ზაქარია ფალიაშვილის სახელობის ოპერისა და ბალეტის სახელმწიფო აკადემიურ თეატრთან არსებულმა ანსამბლმა „სულიკომ“.
