თბილისი, 8 აპრილი — Sputnik. საქართველოში გაჩნდა ასეთი ფენომენი — „გიორგი კვირიკაშვილის ეფექტი“, რომელიც პირდაპირ აისახა ბიზნესის გააქტიურებაზე და მონდომებაზე, რომ ქვეყანაში კიდევ მეტი გაკეთდეს ამ მიმართულებით, განაცხადა ეკონომიკისა და მდგრადი განვითარების მინისტრმა დიმიტრი ქუმსიშვილმა.
მინისტრმა გიორგი კვირიკაშვილის თანამდებობაზე ყოფნის 100-დღიანი პერიოდი შეაფასა და მას დადებითი და პროდუქტიული უწოდა.
„ამჟამად გიორგი კვირიკაშვილის დაანონსებული ყველა რეფორმა მიმდინარეობს. პირველი და ყველაზე მნიშვნელოვანი რეფორმის — გადასახადების დაწევის ნაწილში — განხილვები უკვე დაწყებულია კომიტეტებში“, — განაცხადა მინისტრმა და დაამატა, რომ მთავრობას ამ საკითხში პარლამენტის მხარდაჭერის იმედი აქვს.
ქუმსიშვილის თქმით, უკვე ჩატარდა განათლების რეფორმის პირველი ნაწილის პრეზენტაცია, ის უკვე მოქმედებს, start-up–ის მიმართულების სამზადისი უკვე დასრულებულია და უახლოეს დღეებში მისი რეალიზაცია დაიწყება.
ასევე ძალიან მნიშვნელოვანია პრემიერ–მინისტრის მიერ ინიცირებული სივრცითი განვითარების რეფორმა.
„ამ მხრივ ძალიან აქტიურდ ვმუშაობთ დონორ ორგანიზაციებთან, ასევე აქტიურად ვმუშაობთ ინფრასტრუქტურის განვითარების მიმართულებით… ეს ყველაფერი ძალიან პოზიტიურად აისახება ქვეყნის ეკონომიკურ განვითარებაზე“, — დაასკვნა ქუმსიშვილმა.
