თბილისი, 21 მარტი — Sputnik. უჩვეულო აქცია „გადაიხადე ლექსით“ მიმდინარეობს საქართველოს დედაქალაქში პოეზიის საერთაშორისო დღეს, რომელიც ყოველწლიურად 21 მარტს აღინიშნება.
აქციის ფარგლებში, რომელიც თანამედროვე პოეზიისა და პოეტების მხარდასაჭერად მიმდინარეობს, ნებისმიერ მსურველს შეუძლია თბილისის ერთ-ერთ კაფეში შეუკვეთოს ფინჯანი ყავა ან ჩაი და ამისთვის ლექსით გადაიხადოს.
ლექსებს წერენ სპეციალურად ამისთვის შექმნილ დაწესებულების საფირმო ბლანკზე.
ორგანიზატორები მსურველებს არ ზღუდავენ შემოქმედებაში. „საფასურის“ გადახდა ნებისმიერი ლექსით არის შესაძლებელი — საკუთარით, ან ცნობილი პოეტის, ლირიული ან სახუმარო, რითმით ან თეთრი ლექსით.
„გადაიხადე ლექსით“ აქციის ელჩები გახდნენ თბილისში ცნობილი პოეტი ნანა ცინცაძე და მწერალი და სცენარისტი დავით ტურაშვილი.
„დღეს პოეზიის საერთაშორისო დღეა, ასევე ჟურნალისტიკისა და დაუნის სინდრომის მქონე ადამიანების. მგონია, რომ 21-ე საუკუნეში ყველაფერი უფრო უხეში გახდა, განსაკუთრებით, ურთიერთობები ადამიანებს შორის. პოეზია და ლექსები გვეხმარება, რომ უკეთესები გავხდეთ“, — უთხრა Sputnik-ს ნანა ცინცაძემ.
აქციაში „გადაიხადე ლექსით“ ასევე მონაწილეობა მიიღეს სხვა ქართველმა პოეტებმა. თბილისში ეს ღონისძიება მხოლოდ ერთ დღეს გასტანს.
აქცია ორიგინალური სახელწოდებით „შთაგონება ყოველ ფინჯანში“, ტრადიციულად მთელ მსოფლიოში ტარდება. იგი პირველად 2013 წელს რუმინეთში გაიმართა, რომლის შემდეგაც უჩვეულო ტრადიცია სხვა ქვეყნებმაც აიტაცეს. გასულ წელს ფინჯანი ყავისა და ჩაისთვის 100 000 ლექსის ბლანკით გადაიხადეს მსოფლიოს მრავალ ქვეყანაში სხვადასხვა ენაზე დაწერილი ლექსებით.
