გუდიაშვილის მოედანსა და ახლომახლო ქუჩებზე მდებარე სახლები „ფოლადის პერანგშია“ მოქცეული. იქ უამრავი რკინის ბურჯი გაჩნდა. იხილეთ Sputnik–ის ფოტომასალა, რომელიც თბილისის ისტორიული მოედნის დღევანდელობას ასახავს.
გუდიაშვილის მოედანსა და ახლომდებარე ქუჩებზე აღმართული რკინის ბურჯები სარემონტო–აღდგენითი სამუშაოების პროცესში გაჩნდა. თუმცა ეს ძველი შენობა–ნაგებობების ფასადის ნაწილი არ არის. ისინი მიწისქვეშა სამუშაოებისას სახლების შესაძლო დაზიანების თავიდან ასაცილებლად გახდა საჭირო.
ადგილობრივი მოსახლეობა, ცოტა არ იყოს, ღელავს და აცხადებს, რომ თუ რკინის კონსტრუქციები ჩამოიშლება, ვერც ავარიულ სახლებს იხსნის ნგრევისგან და მეზობელ შენობებსაც დაანგრევს. სპეციალისტების აზრით კი, რკინის ბურჯები ამჟამად ერთადერთი გამოსავალია ძველი შენობების შესანარჩუნებლად.
გუდიაშვილის მოედნის რეაბილიტაცია მასშტაბური პროექტის „ახალი ტფილისის“ ნაწილია, რომლის განხორციელებაზეც მხოლოდ მიმდინარე წელს სახელმწიფო 21 მილიონ ლარს გამოყოფს. კონკრეტულად გუდიაშვილის მოედნისა და ახლომახლო ქუჩების რეაბილიტაციაზე 7 მილიონი ლარი დაიხარჯება.
